Sunday Girl：慳模林莉扮靚就住使
由港姐轉型成為名模的林莉（Carrie），近日獲不少名牌垂青邀她行天橋，成為新一代模界寵兒！工作量增多，收入自然提升，原本是「宅女」的Carrie，如今愛上打扮，假日喜歡相約友人行街買衫，她說：「我以前係一個宅女，就算幾日唔出街都得，亦唔鍾意亂買名牌，不過自從今年接觸model呢行，見到啲品牌嘅衫真係好靚，自己亦因為工作關係，注重打扮，所以依家放假都會去shopping。」
女人天生購物狂，不少女星到名店購物相當豪爽，但本性慳家的Carrie坦言會量入為出，她說：「雖然置裝費貴咗，試過一對高跟鞋買咗幾千蚊，好肉赤，不過我會應買則買，有時買吓靚衫靚鞋獎勵自己都OK嘅！（平日點理財？）哥哥做理財基金嘅，所以我將啲錢交畀佢管理，我相信佢眼光，依家都有賺到錢，（目標買樓？）呢個係我最大嘅目標，好想自己擁有一層樓，到時可以同父母一齊住。」