深情對話：黎耀祥：演戲圓滿我生命
如今黎耀祥就似君臨天下，昔日那個周潤發身邊的大茄，已蛻變成呼風喚雨的視帝。連演唱會之父張耀榮都要搵他在紅館開騷，就知道祥仔並非柴九咁簡單，更是一隻金蛋。不過只愛做演員的他推卻美意，寧願素位而行，做一隻演藝大海中飄泊的雀仔：「只有做演員先可以圓滿我生命！」
黎耀祥：祥 記者：記
變化 「是但男」好知足
周潤發當年何嘗不是從大茄做起，這是從事演藝事業的必經之路。就在廿多年前，大茄黎耀祥有幸見到發哥返無綫拍劇還債，大明星喎！祥仔只顧偷師，沒有特別感覺。如今祥仔成了視帝，新一代茄哩啡也重複祥仔以往的路。
記：如今好多人都睇你台戲，出道時你又睇邊個呢？
祥：好記得廿幾年前我仲係超級大茄，剛從訓練班出嚟，發哥當時已經係Super Star，喺出面撈到風生水起，不過佢要返TVB還債，所以有幸同佢同劇演出，當年我同佢冇對手戲，連對白都冇，但我就從佢身上偷演技，就似海綿咁吸，吸到今日仲喺度吸。
記：換句話說，人紅咗，新人正走你嘅路？
祥：可以咁講，不過睇吓你想喺呢個圈得到乜嘢，仲有係畀到個圈乜嘢，而唔係個圈畀到你啲乜，會成正比，不過要睇彩數。
記：得到視帝殊榮，對你嘅變化有幾大？
祥：我係一個冇感覺、冇目標、冇理想、唔恨名利嘅人，只要有得演戲就好滿足，已經得到圓滿，圓滿我自己。要做大明星絕對唔係我兒時夢想，只因為演戲係我生命一部分，要填滿我精神空虛，就只係咁多。我嘅生活冇太大變化，一樣去九龍城街市同茶餐廳，只係有時人多就好似特首出巡。
記：人紅自然就想搵更多？
祥：我好知足喇，黎耀祥係一個「是但男」，我唔想進軍內地，又唔想拍電影，甚至進軍甚麼荷里活，依家夠使真係好滿足。我有時仲會諗唔紅有唔紅好，做大茄其實好開心，起碼唔使擔心收視，冇壓力！
記：已婚，亦有一個囝囝，成頭家擔晒，未紅之時搵嘅夠使嗎？
祥：當然唔夠依家多，不過以前真係好開心，人生好似演戲咁極之飄泊，又浪漫，當時大陸有好多夜場騷，甚至連江西、浙江我都有去做騷。我收工就搭黃巴士去深圳，再轉到廣東省各地登台，做完即時漏夜搭通宵巴返屋企，怕畀老婆鬧。當時真係要密食當三番，依家身價貴咗，人哋都冇再搵我喇！
得到 用心做懶理好壞
世事充滿奇妙，知道得愈多，就等於知道得愈少。人是渺小的，為何要專注一些無關痛癢的事情？去年得到視帝，連演唱會之父張耀榮都叫祥仔開Concert……祥仔，你又點諗？
記：無綫劇集質素近年惹來不少詬病，對你有影響嗎？
祥：絕對冇影響，我不嬲唔會理會公司嘅事，我又唔係幫高層打工。演員有佢嘅實際用途，監製、編劇可以寫個劇本好差，佢哋亦都可以唔用我，用個渣嘅，我冇所謂，但我一演就會全心去做，演員係獨立個體，套劇本身差，佢都可以得到掌聲。
記：淨係鍾意演戲？
祥：我唔係一個全能藝人，只係要做演員，只此一樣，唔需要做歌手，我唱歌只係業餘。舊年張耀榮聽過我同鄧萃雯唱《祗有情永在》，佢就即刻打畀我問我想唔想開演唱會，佢話冇信心冇問題，喺文化中心開都得，當然紅館都OK，我諗咗好耐，就算我喺紅館開個唱都係冇意義，冇必要去做，咁就推卻咗！
記：無綫劇集變質，會唔會因此小心揀劇本？
祥：好難，因為好難推，惟有食少啲，唔好咁貪。
記：感到痛心？
祥：隨緣啦！我係有歷史使命，而歷史有佢嘅洪流，冇嘢係永遠向前行，我自己都唔可以要求每年都進步，冇進步其實都好，可以有更多時間反思，一間公司都一樣，唔會有公司永遠都只係上山。
攞獎 心裏有數五五波
一年容易又台慶，祥仔今年又標尾會加入戰團搶視帝，究竟《巾幗梟雄之義海豪情》會否為他冧莊，還是打回原形做番一個無冕之王？其實祥仔早已心裏有數。
記：《巾幗2》會唔會為你帶來包袱？
祥：唔會！因為我已完成一件近乎完美作品，每次添哥（李添勝）講起呢套劇都會滔滔不絕，因為佢都覺得冇遺憾！要知道一套劇要完美並唔容易，牽涉嘅人喇，我有睇過opening同第一集part 1，已經好有追看性，係一套真正雕琢嘅作品。
記：今次你嘅角色同柴九有乜分別？
祥：今次我演嘅劉醒，性格同柴九完全唔同，柴九似一個小朋友，亦會向上爬；而劉醒就係一個完全冇性格嘅人，一直為個妹（陳法拉）醫病而去生存，一直被命運播弄。今次添哥唔再玩金句，再冇「人生有幾多個十年」，而係去立體成套劇。
記：有冇信心冧莊？
祥：以戲論戲，呢套劇係接近完美，呢套係我入行以嚟演得最投入嘅戲，劇組人員都問我點解成日都唔出聲，冇辦法，太難抽離。但攞獎要睇政治因素，所以我信心只有五五波。
國恨 驕傲身為中國人
這是一個艱深的課題，香港有家仇國恨、傷春悲秋的風骨嗎？若遇大是大非的問題，香港人彷彿忽然愛國，忽然喚醒我才是中國人，祥仔不禁大嘆我們生活太過豐足。
記：呢套劇有講日本侵華，點睇家仇國恨？
祥：我係一個民族性好強嘅人，好proud of自己係中國人，中國人係一個苦難民族，而我自細就好鍾意詩詞歌賦，好有中國文人氣息，係一個傷春悲秋嘅人。從日本侵華到國共內戰，中國人一直都喺戰火生存，小人物一直備受命運播弄，新世代嘅中國好難會感受到，尤其係香港人。
記：點睇中日關係？
祥：冇人想戰爭，日本人都係一樣，但歷史遺留嘅問題一直引起波瀾，然而歷史係會重複，冇辦法，如果真係打仗，大家都係輸家。
紅了也不假手於人
這個訪問個多月前早已約定祥仔，他不是天天為《天天天晴》開工，就是要出埠為新劇造勢，因為祥仔的賢內助Julia就是他的經理人，他每次都是親自致電小記，顯得萬般不好意思。就連拍攝當日，祥仔和Julia都是親自執衫，絕不假手於人，大抵他早已明白孔子名言「素其位而行，不願乎其外」的意思，人紅了，也是這個黎耀祥。
三強爭霸
今年視帝之爭，不出黎耀祥、陳豪（阿Mo）和林峯三頭馬車之爭，大敵當前，祥仔把酒論視帝！
祥仔看陳豪
「《公主嫁到》時勢所造，收視好，因為搞笑，所以好突出，呢個係佢優點，阿Mo真係有機會再奪視帝。」
祥仔看林峯
「佢係TVB嘅希望，肩負起一種無形使命感，佢已經集合天時地利人和，我唔反對偶像派攞呢個獎，因為全世界都需要偶像。」
祥仔看黎耀祥
「劉醒個角色好實在，太鮮明，我唯一嘅優勢就係演技好過佢哋兩個少少，睇吓觀眾需要實力派，定係搞笑嘅阿Mo，定係偶像派嘅林峯。」
文：霆
攝：黃叔榮
服裝：Evisu
場地：ifc、G Bar
髮型：IvanLee@Headquarters