High Tea：李心潔愛無悔：唔怕風吹雨打
李心潔向來感情事低調，但婚前老公彭順與o靚模羅凱珊（Kama）的緋聞，婚後繼母身份均成傳媒追訪對象，承受種種壓力，她處之泰然，年初終拉埋天窗，更揚言與老公「風吹雨打都唔怕」！一副幸福小女人的模樣。
相隔多年心潔婚後再演舞台劇《命運建築師之遠大前程》，無獨有偶與恩師張艾嘉再次合作，為她度身訂造圍繞幸福的題材。
「真正幸福係身邊有一個深愛嘅人，相反得自己一個，一定覺得孤寂！幸福未必要擁有好多，最重要識得知足，如果好有錢，但覺得唔夠，有100萬就想要300萬，就唔會幸福。兩個人相處，彼此唔了解都唔會結婚啦，所以心靈好重要，要聽自己嘅心聲，同埋自己需要啲乜。」
生命無常 活在當下
「依家我算係幸福架，開始識得珍惜身邊擁有嘅嘢。生命無常，所以要活在當下，珍惜現在，今日唔知聽日事，我唔會去諗將來。有一日我揸車，喺度諗如果我撞車死咗，會唔會後悔？我答案係冇，因為我盡力去愛身邊嘅人，勇敢去愛一個人就要話畀佢知，人一世成日驚嗰樣唔去做，你一定會後悔。」
親情 老公送花至warm
「人與人相處得耐，你會發覺大家價值觀變得好似，好似石頭擺埋一齊互相摩擦，形狀會愈嚟愈夾，我同老公拍拖一段時間，到咗呢個境界先決定結婚。我哋可以話係互相珍惜，大家成日分開做嘢，但每當諗起佢就覺得好幸福，因為佢已經喺我心入面，我哋嘅愛已經係好大好壯嘅樹，就算風吹雨打都唔怕！」
「我哋會珍惜相處時間，會做好多大家都鍾意嘅嘢，例如去睇戲，差唔多每次見面都會去睇。佢有時會諗啲橋氹我，最sweet係一次佢嚟機場接我時送花，嗰時真係好warm！我比以前成熟咗，冇咁任性和霸道，以前我會堅持自己，爭到贏為止，依家我會尊重佢嘅諗法同感受，嬲嗰陣會叫自己冷靜，所以我哋好耐冇鬧交，覺得鬧交好攰，包容就係大家相處方式，想對方快樂。」
生兒育女 順其自然
做後母並非易事，心潔坦言曾有適應期，但她從不計較，相信愛的付出對方會感受得到。
「佢好懂事，我覺得愛嘅付出好自然，從來冇考慮自己有幾辛苦，有幾大負擔去愛一個小朋友，付出嘅愛令生命變得更好，係值得嘅。當然最初有適應期，需要學習點同小朋友相處，但世界上冇完美父母，淨係想畀佢知我有幾愛佢，一世都愛佢，無論佢生命中發生咩事，我都會喺佢身邊，呢個就係我對佢嘅原則！」
「結婚以嚟都有人問過我幾時生小朋友，但呢啲嘢順其自然啦，一切都要睇時機，但依家好多工作要做，都未有時間去諗呢個問題。」
事業 演到90歲不言休
「8、9年前鬼片系列令我走上事業第一個高峰，難免被人標籤只能拍鬼戲，但我想演唔同類型嘅戲。我會視最熱愛嘅表演為終身工作，90歲仲有能力都會去演，想不斷鍛煉自己，成為一個全面演員。我當然期待再跟恩師張艾嘉和老公合作，不過始終合作好幾次，有好劇本同角色先至再諗啦。」
後記 張曼玉影響至深
「我唔係細細個就想做演員，記得16歲時睇咗張曼玉套《阮玲玉》，覺得好震撼，明白一個演員點將角色演到好有生命力和靈魂，所以入行以嚟好想同佢合作，向佢學習，自己又好迷戀佢，佢對我成為演員有好大影響。」
場地：8度海逸酒店
髮型：Domanic Tao（Orient 4）
化妝：Yan Chiu@make360.com.hk
文：專案組
攝：沈建程