張敬軒想幫亞視拍音樂特輯
張敬軒、謝安琪（Kay）前晚為《屈臣氏健康美麗大賞2010》擔任表演嘉賓，亞姐李妮亦有現身。無綫與四大唱片公司的版稅風波仍未解決，有傳媒日前發現四大唱片高層與亞視高層飯局密斟，盛傳亞視將舉行大型頒獎禮。身為環球歌手的軒仔說：「飯局都好正常啫，之前都有上過節目，我哋歌手都要保持電視上嘅出鏡。（頒獎禮得四大唔夠說服力？）都有代表性嘅歌手，好似陳奕迅、方大同。（傳你哋拍音樂特輯？）有新合作嘅話都值得試嘅。」Kay則坦言早前曾與有線合作到韓國拍攝音樂特輯，她說：「支持公司決定，任何好質素嘅音樂製作都支持。」
另外，軒仔師弟樂隊Mr.成員Alan捲入桃色糾紛，軒仔表示未知內情，但力撐Alan乖仔：「佢嗰刻都係做番每個男仔會做嘅動作。」Kay則謂：「未知咩事，後生仔嘅嘢，見到佢先問，特登打去好似好八。」
