雯女撐監製：唔掂執牛屎

祥仔、雯女、陳法拉、黃浩然、謝雪心與敖嘉年等昨日為後日首播的台慶劇《巾幗梟雄之義海豪情》造勢，眾人穿着戲裝於台上擊鼓振聲威，士氣高昂。期間，監製李添勝表示：「如果呢套戲唔好睇，我返鄉下執牛屎。」雯女則笑言：「咁我開個有機農場用番啲牛屎啦！」法拉事後亦和應說：「咁我咪返美國執牛屎囉！」雯女又指祥仔於第一輯時表示收視好請大家去旅行，她問祥仔：「今年請唔請？」祥仔則醒目謂：「今年收視應該破梗，你賺咁多外匯，一齊請囉！」

望奪最佳劇集獎

之後祥仔做訪問時表示有信心《巾幗2》可破《大長今》收視，問他是否又計埋網上收看率，他說：「梗係唔計，就算唔計都可以破紀錄，紀錄保持者係韓劇喎，當然想破佢哋。（破咗係咪請去旅行？）呢個一定唔會，請食飯就難免。」雯女睇完首播便飛到內地拍劇，他要獨力撐宣傳？祥仔笑言：「佢都會度期返嚟宣傳，大家好重視呢個劇，佢好辛苦架！賺人仔都好辛苦。」他坦言寄望首集收視有38點，更有信心贏《公主嫁到》，成為今年「最佳劇集」。

對於被祥仔拉落水，雯女笑謂：「又唔見佢攞三個獎分個半畀我！」她又說：「我睇完第一集便返橫店拍劇就冇得睇，所以台慶亮燈後我乜都唔會做，一定坐定定睇，之後我都會盡量度期返嚟宣傳，為呢個劇犧牲都好大。」

祥仔拉雯女落水，揚言收視破紀錄會請食飯。

雯女、祥仔與監製李添勝舉杯預祝收視旗開得勝。

法拉姦戲賣關子

陳法拉在劇中有場被日本人污辱的戲，問是否最激演出，法拉賣關子說：「到時大家睇吓咪知！（之前都試過拍劇除剩bra？）嗰次淨係行來行去，今次意識唔同，相信觀眾唔係睇我身材，係會睇得好感動。」而敖嘉年與祥仔多對手戲，被問到有否信心角逐今年男配角獎項，他說：「好難講，咁多對手。」之前《抱抱俏佳人》導演黃真真指藝員演戲機械化，有份參演的嘉年說：「唔可以咁講，電影同電視分別好大，自己唔覺得，不過佢係專業導演，咁講自己都會留意吓。」

文：影視組