JC嗌收口渡邊拒驗胸
日本名模渡邊知夏子早前曾質疑Jessica C.（JC）的「警鐘胸」造假，前晚二人狹路相逢同台行騷，JC直言希望對方收口，而渡邊反諷對JC身材冇興趣。
前晚日本名模渡邊知夏子及Elli Rose專程來港，聯同諸葛梓岐、JC、Cara G.行騷，同場還有謝婷婷、李蘢怡及來自台灣的女星陳喬恩擔任嘉賓。
曾被渡邊質疑打假波的JC，得知與對方同台行騷時，反應甚大：「原來係佢，我依家先記得呢件事，頭先綵排見到佢，但大家冇傾偈，希望佢唔好再講。（你有冇嬲佢﹖）冇，但佢傷害咗我。」再問會否與對方打招呼，JC停了兩秒才說會，但就拒絕被渡邊摸胸以證真偽，她強調：「冇人可以摸我，除咗我男友之外。」對於有人利用紅外線攝錄機偷拍，她大叫Crazy，認為要立例保障私隱。
合作開心冇尷尬
至於渡邊初時稱很開心與JC合作，但當記者提醒她曾質疑對方打假波，她即笑笑口說：「你哋真係好記性！當時我咁講係因為聽到謠言。」她指與JC同場不會尷尬，問到會否摸JC胸去驗證？她肯定地說：「絕對唔會，我對呢方面冇興趣。」至於有關紅外線偷拍事件，她稱在日本也有類似情況發生過，但認為對已發生的事就不要在意。
陳喬恩想識港男
另外，陳喬恩將留港三日，並在昨晚欣賞楊千嬅演唱會，她直言羨慕對方搵到心目中王子，她說：「千嬅同佢老公經常微博傳情，好甜蜜。」她稱有意在港拍戲，故要練好廣東話：「朋友都話要識個香港男友先可以學好廣東話。（有乜擇偶條件﹖）感覺最重要。」
文：名人組