與夏文汐情緒投入 陳偉霆未出軌先出血
近日正與夏文汐拍攝電影《出軌的女人》的陳偉霆（William），片中出軌的任務雖交給女角，但他在現實中卻付上出血的代價。前晚他與蔡卓妍（阿Sa）出席音樂會，William跳舞時不慎擦損手，要貼膠布止血。談到夏文汐被傳媒拍得與o靚仔打得火熱，問到William有否見過對方探班？他說：「冇見過任何人探班，亦唔見佢（夏文汐）傳短訊。」
William表示日前剛與夏文汐拍攝對手戲，問到有否覺得對方蜜運中？他說：「戲中我同佢情緒都好投入。（擔唔擔心佢幻想你係o靚仔？）唔知佢情緒點投放。（如果佢睇中你會點？）如果睇中先算。（覺唔覺追你？）到時先算啦。」問到會否揀媽媽及姐姐級作另一半？William尷尬說：「遇到先算。」
阿Sa不追問阿嬌
而阿Sa透露因耳水不平衡而頭暈，對於好姊妹鍾欣桐被指成功撬鄭融牆腳戀上音樂人莊冬昕，阿Sa又以「啱啱返香港唔知」作答，即被指經常借不在港來迴避問題，阿Sa笑說：「呢個答案好用，好過答唔回應。」
阿Sa強調不會追問阿嬌感情事：「時間一到就水落石出，唔需要勉強去知。（怕好似你咁宣布結咗婚同時宣布離婚？）我係個別例子。」
另外，阿Sa與William昨日到鄭州安陽舉行歌友會，她昨晚在微博透露發生小意外，原來他們乘坐的座駕被一輛貨車cut線輕碰，有工作人員更見座駕冒煙，幸最終無人受傷。
文：音樂組