阿佘熱爆視后 公然倒米

無綫劇集《公主嫁到》叫好叫座,令佘詩曼成視后大熱,無綫為了幫親生女造勢,於昨日公布該劇大結局收視,破天荒連網上觀眾都計埋,指平均收視高達51點。監製梅小青有意添食之際,阿佘竟表示開拍續集角色難發揮,認真倒米!

一年一度的無綫台慶頒獎禮,將於十二月頭舉行,視帝視后之爭,當然成為大眾焦點!今年視后大熱之選,當然是近期熱爆劇集《公主嫁到》的阿佘,以及來勢洶洶,挾着《巾幗》大勢而來之《巾幗梟雄之義海豪情》的鄧萃雯,無綫為了幫「親生女」阿佘造勢,昨日公布《公主嫁到》大結局收視,竟罕有地計埋網上收看人次,令大結局原本平均收視只得42點的《公》劇,在無綫「出招」後,加埋網上的9點收視,令平均收視高達51點,令阿佘爭視后之路,加添聲勢!

攞視后聽天由命

昨日,《公》劇舉行祝捷會,阿佘、陳豪、鍾嘉欣、黃浩然、馬國明以及監製梅小青等均有出席,演員們大開香檳慶祝,陳豪更興奮得將香檳四圍射!

對於視后之爭,阿佘被視為大熱之一,她笑言:「獎項隨緣,(《巾幗》續集係《公》劇嘅大對手?)我都期待睇,自己都有睇《巾幗》第一集。」至於會否覺得鄧萃雯是她的最大對手?阿佘表示:「又唔可以咁講,公司咁多好製作,係好現象,希望每一部劇都係咁,都會被視作為競爭對手,咁就最開心,獎項嘅嘢控制唔到。」

同鄭嘉穎有偈傾

陳豪與阿佘昨不約而同表示希望《公》劇開續集,監製梅小青則表示:「我都希望《公主嫁到》、《宮心計》開續集,但開邊套先,要諗一諗,不過,我都想開《公》劇先,因為係喜劇,不過,因為要搞《法證先鋒III》,成事嘅話都要年中先得。」

問阿佘想開邊套先?她表示:「好難揀,開《公》劇先,角色冇咁好發揮,因為公主都唔再刁蠻,唔好笑,若果係《宮心計》續集,我希望做奸角,覺得發揮大好多。」

至於日前阿佘與鄭嘉穎出席商天娥婚禮,被指飲醉兼同嘉穎無偈傾,阿佘一一否認,指自己冇醉之餘,亦有同嘉穎傾偈。

文:影視組