無綫今年播出的《談情說案》、《女人最痛》、《飛女正傳》等均被指有「抄襲」成分，連最近播出街，由林保怡、黃宗澤主演的《讀心神探》，亦遭網友踢爆明抄美國電視劇《Lie to me》。《Lie》由去年開始在美國播映，今年尾將播出第三季，《讀》劇雖然只播出一集，但有不少眼利之人已發現兩劇有好多相似地方。
細微位一樣抄足
由林保怡飾演的神探與《Lie》劇男主角卡爾萊曼博士，同樣在童年時失去至親，雖然大受打擊，但長大後同成為一位觀人於微、能憑人的肢體語言和面部表情分析犯案疑點，而兩人在處理案件的手法亦是靠翻睇案情來破案。
除人物性格相似外，就連一些細微位置亦「抄」到十足，像林保怡引用美國前總統克林頓偷情的例子，和男女搭膊頭假裝情侶的相片，在《Lie》片亦有出現。
而曾監製《妙手仁心》一劇的無綫前監製鄧特希，表示對無綫「明抄」已習以為常，他說：「我之前睇過《Lie to me》，當時心諗無綫幾時會抄呢？以前無綫喺亞洲區係一個主導位置，依家成日畀人鬧，但好多行內人對佢『抄』已習以為常。」
對於劇集被網友勁插抄襲，男主角林保怡回覆謂「問監製」，而女主角田蕊妮坦言冇睇過《Lie》，但強調自己角色是原創。至於監製徐遇安則承認睇過《Lie》，他說：「我哋係以FBI嘅案件做藍本，其他所有警匪片都係如出一轍啦，觀眾耐心睇落去就知唔同。」
文：專案組