阿嬌有頭難擰暫停接job
鍾欣桐（阿嬌）昨日出席頒獎禮，透露早前在內地拍攝電視劇因長期戴住超重頭冠搞到頸椎位生骨刺，導致頭部不能左右轉，為保頸椎盡快痊愈，阿嬌短期內不會接拍大動作的廣告及電影。
阿嬌昨日穿上Kloset品牌Tube Dress與洪卓立、詩雅、Ana R.、汪圓圓及焦媛等出席活動，剛由內地返港的阿嬌成為全場焦點，吸引不少途人爭相拍照，場面混亂。久未露面的她大吐苦水說：「返咗香港成個星期，日日都留喺屋企，因為條頸生骨剌，去咗針灸。（醫生點講？）話好嚴重，依家兩邊擰都好痛。」
痛到瞓唔到覺
阿嬌表示原本可在內地診治，她說：「痛咗幾個星期，因為拍攝地點同睇醫生地方好遠，加上好攰，所以冇睇到。（休息幾耐？）依家有一個星期休息已經好好，要戴頸箍先坐到，痛到瞓唔到。（工作受影響？）唔可以接大動作嘅廣告同電影。」曾表示有意做打女的阿嬌說：「到時會好番。」
而身穿連身短裙的汪圓圓表示由細到大都貪靚，對於不少藝人被踢爆整容？汪圓圓說：「對自己不滿去整係佢哋決定，同人冇乜關係。（你會整？）暫時對自己好滿意，不過人會變，保留呢個空間。」
丁子高全身腫
此外，本來昨日出席活動的丁子高卻缺席，原來他昨日凌晨在微博留言表示晚飯後出外跑步，怎知出現食物敏感，全身變腫趕往醫院求診，他並上載戴上口罩照片。之後千嬅亦留言表示勁擔心。記者昨聯絡千嬅，她坦言當時忙着工作，不知老公因食物敏感入院，收工後飛車趕到醫院，奶奶以醫院多病菌而趕她走，後老公報平安指打了針冇乜事。
採訪：音樂組