深情對話：甄子丹take it easy紅得唔遲
於電影圈浸淫了三十多年才成為「宇宙最強」的紅人，用「大器晚成」來形容甄子丹絕不為過。子丹坦然面對晚來的高峰，直言來得遲是好事：「依家嘅我先有智慧去面對，先識得珍惜。」
記：記者 甄：甄子丹
記：到底幾時開始，甄子丹多了個綽號叫「宇宙最強」？
甄：我自己都唔清楚，大概好多人以為我覺得自己係宇宙裏最好打嘅人，但事實上自己從來冇咁講過，亦都唔會咁諗。每個演員都會有人接受或者唔接受，我唔介意，無論係畀人嗌「宇宙最強」定係「宇宙最忙」都好，點都好過「宇宙最屎」呀！哈哈！
記：武打演員要成功彈起，係咪好難？
甄：係！武打演員要成功絕對唔係睇你有幾打得咁簡單，觀眾要求嘅嘢唔會咁簡單，由《葉問》到《精武風雲‧陳真》，我都要好花心機去演自己嘅角色，做武打演員一定要學識演戲先可以真正轉型，我都浸咗三十幾年啦！演員係需要生活體驗去沉澱，然後每次同唔同導演、唔同演員合作，演技自然會進步，我自己係結咗婚之後先開竅，學識咗放低自己，演技係要好放鬆，我哋做武打演員一嚟就要擺好架勢，原來只要做番個人就識得演戲，將幾十年累積嘅演技一下子放晒出嚟。
放下身段‧投入家庭
記：家庭對你影響好大？
甄：係！有家庭生活我先可以放低好緊張嘅狀態，我都只係一個普通人，同囝囝喺屋企碌地，帶仔女去街會踎低嚟照顧佢哋，呢啲都會令我放低，學識咗入世嘅生活，亦都直接令我演戲可以自由發揮。
記：太太會唔會怨你經常離家數月？
甄：詩詩佢好勁，佢好明白我，而且屋企同外面應酬佢全部搞得頭頭是道。無論我去邊，每日一定會同佢通幾次電話，大家唔好忘記，佢除咗係我太太，仲係我一生最好嘅朋友，通電話唔係交代，係分享，我有好多嘢同佢講，佢都有好多嘢要同我交流。
記：有咩辦法唔傳緋聞？
甄：我係個大悶人，同埋呢個係原則問題，我唔會犯錯，拍戲已經攰到死，放咗工我從來都唔出去食飯，寧願叫room service，最憎出去食飯人又多，要同人交流喺片場咪得囉，大家都知我係悶人。我相信自己唔會有緋聞，因為我好珍惜我老婆，做人每一天、每一件事都係選擇，呢個係我原則，我會每日喺心度叫自己要做一個更加好嘅演員、一個更加好嘅丈夫、一個更加好嘅爸爸。
大器晚成‧學懂珍惜
記：有冇睇番以前嘅作品？
甄：有，好差！每個演員都要「浸」，我都「浸」足三十年啦！
記：覺唔覺得自己「大器晚成」？
甄：我覺得遲嚟好過早，大器晚成係好事。我enjoy呢個時刻，依家嘅我先有智慧去面對，依家先識得珍惜，太過早嚟結果一定唔一樣，以前嘅我未必識得處理。
記：「晚成」仲撞正內地電影巿場起飛。
甄：呢個係運氣。
記：有傳你片酬最高去到二千五百萬。
甄：哈哈……傳聞啫！股票都有升有跌，演員巿場都係有調節嘅，有啲地方演員收票房嘅十分一分紅添，片酬嘅嘢唔係我甄子丹話幾多就幾多，係巿場價。
記：係咪好耐冇放假？
甄：早前暑假放咗三、四個星期，陪屋企人，我好希望明年可以有多啲時間留喺香港，但冇辦法，好多嘢唔到自己控制，尤其係宣傳，一定要全國跑。
記：拍戲辛苦定係跑宣傳辛苦？
甄：拍戲舒服啲，拍戲對我嚟講可以好專注，淨係諗點樣做好啲，但宣傳每日要答好多問題，面對好多事。
退居幕後‧回饋影圈
記：你以前接受訪問講過做武打明星咁多年一身傷，力拚五年賺夠退居幕後，時至今日係咪仲咁諗？
甄：冇變過，不過我覺得此時此刻係我創作嘅黃金時期，我有三年冇做動作導演，直到《精武風雲‧陳真》真係全面爆發，喺手法上好創新，陳可辛講過我應該做導演，但依家手頭上咁多戲，做導演要顧及好多，要好花時間。無論做幕前又好，做幕後又好，好難離得開電影，自己喺呢行咁多年，累積咁多經驗，一定係想將來幫番個圈，幫番啲新人，幫番我哋動作電影，呢個係我最大嘅願望。
愛家男女
甄子丹愛家庭錫老婆，無論是舒淇還是霍思燕，均說「要嫁就嫁甄子丹型的男人」，其實圈中愛家的男女亦大有其人。
張栢芝
張栢芝出道後迅即走紅，片約紛至的她，對家人照顧周到，有指全家上下一概由她資助。及至栢芝與霆鋒結婚，她對自己的小家庭亦義無反顧，寧願放下如日中天的事業，全天候照顧老公和小朋友，成為不少人眼中的愛家好女人。
徐熙媛姊妹
徐熙媛徐熙娣紅遍中港台，兩姐妹除了感情好，去年更爆出兩人多年來為父親償還巨款，雖然最後父母都要離異收場，但兩人一直沒有埋怨父親，並努力負擔起照顧母親的責任。
任賢齊
除了甄子丹外，圈中另一出名好男人便是任賢齊。小齊與女友Tina拍拖逾廿年，入行後雖與不少女星合作，但一直與緋聞絕緣，兩人先後育有一子一女，堪稱圈中幸福美滿的家庭。
文：影視組
攝：秦健輝