李蘊周子揚啱嘴形拖手仔
歌手李蘊近日與華納新人周子揚秘密撻着，有傳兩人為保事業將戀情低調，只有數名身邊好友知道兩人蜜運。記者昨日分別致電一對小情人，女方默認與子揚發展，還大讚男友好仔，但子揚只肯承認李蘊是啱傾的朋友。
頻頻單獨食飯
據知，嬌滴滴的李蘊喜歡打鼓，與子揚傾談音樂時，被其才華深深吸引。近月子揚與李蘊頻頻單獨約食飯、唱K及睇戲，男方還細心送女友返屋企。李蘊昨日接受電話訪問初時，只以「好朋友」形容與子揚的關係，但當問到對方有否拖她的手？李蘊煞有介事說：「唔好講呢啲嘢。」再三追問下，李蘊終肯承認：「有！」她擔心戀情被踢爆搞到分手：「唔想一個月就冇。」
劉欣宜反應大
而子揚大方承認與對方有單獨約會，他說：「之前大家都係同一屆新人，所以好多時都會約出嚟食飯。」他坦言李蘊是傾得埋的女性朋友：「大家係啱傾。」問到是否發展中？子揚不置可否說：「總之大家係好朋友。（想低調？）拍拖唔諗住，專注事業先。」不過子揚表示不排除日後有發展機會。另外，劉欣宜得悉好姊妹李蘊拍拖反應甚大：「吓！咁驚喜？我日日見李蘊，係咪真架？」
文：音樂組