簡華捷詠春最強︰要對方瞓低

「人為刀俎，你莫為魚肉。」曾隨葉問學藝七載，以發揚正宗傳統詠春為己任的簡華捷師傅，認為在這個看似愈來愈文明，實則野蠻人愈來愈多的社會裏，無論遇上癲佬斬人，抑或菲律賓挾持人質事件，詠春都有其經世致用的價值。

詠春強調應發力時才發力，即使出拳也要在臨碰觸到對方身體的最短距離時才「長橋發力」，簡師傅指即使以撩交打為樂的李小龍，也深明不作無謂消耗的道理。

在外國不時有簡華捷的報道。

李小龍除衫甩身

簡師傅說：「呢件事係小龍同我講，有次佢又撩人打交，點知人哋愈嚟愈多人，小龍見敵眾我寡，就一口氣跑咗上幢唐樓天台諗計走，本來佢想跳過對面樓，但距離實在太遠，你估小龍點做？佢除剩條底褲，拎副黑超出嚟，瞓埋一邊扮曬太陽，班仇家追到上嚟，搵唔到人，就問小龍見唔見有後生仔經過，小龍隨手指指，班仇家信以為真追咗去，小龍就咁甩到身，你話佢幾醒目呢！」

葉問也曾教弟子「三拳不能把對手打倒，就要走」。（見《葉問•詠春２》第133頁）

因為練過詠春，簡華捷稱就算與門多薩拎槍互射，打出的子彈都準過他。

揸起槍手更加直

在這個於空地乘涼會遇上癲佬斬人，到外地旅遊會碰上持槍狂徒的社會裏，詠春的重攻重守，有相當的實用價值，簡師傅說：「菲律賓人質事件我都有留意，我經常要搭飛機，我都曾經諗過如果我遇上劫機，我會點呢？我可以講，我一係唔出手，若果我出手，我唔係要傷人，而係要對方瞓低。（即使遇上菲律賓人質事件嘅持槍狂徒，你都照樣出手？）曾經有人問我︰『如果人哋一槍打埋嚟，你識功夫又有乜用？』我會話，就算我同個槍手一樣拎住支槍互射，我打出嘅子彈都準過佢，因為練詠春令我揸起槍嚟雙手比其他人都要伸得直。我唔係蠢，你用槍時，我梗係唔會拎對八斬刀出嚟對你。我記得師傅以前成日話練力難，點樣練到將力應用則用，就係詠春易學難精嘅原因，唔知解唔解答到你關於係咪出手、幾時出手嘅問題。」