陳偉霆險象環生舞照跳

【洛子皓廣州直擊】跳舞歌手狄易達及陳偉霆（William）前晚出席廣州舉行的音樂會，達仔帶埋幾位舞蹈學生表演時，不慎踩爆玻璃台板，玻璃碎片插入鞋之餘，達仔跟William仍照樣在台上跳舞，險象環生。

達仔、William、泳兒及謝安琪（Kay）等歌手前晚獲邀出席有關亞運的音樂會，打頭陣的達仔帶埋一班舞蹈學生於台上載歌載舞，非常熱鬧，期間有學生不慎踩爆一大塊玻璃台板，令玻璃碎片散落滿地，但處變不驚的達仔仍然冒險做出多個倒立動作，夠晒專業。

他事後表示：「有啲玻璃碎插咗入個學生隻鞋度，好彩冇人受傷，我都知好危險，好多動作已經臨時取消避免受傷，我反而擔心要賠錢就唔知點算！」隨後演出的William表示未有留意台面的玻璃破裂，繼續勁歌熱舞，非常投入，他說：「之前試過喺紅館差錯腳，搞到整傷條韌帶舊患，依家跳舞好多動作都做唔到！」

同場的Kay表示身體抱恙，有幾聲咳，她說：「最近忙緊宣傳隻國語碟，四圍飛同埋去拍嘢，搞到唔係好夠瞓，（同個仔隔離？）唔會，我呢種唔會傳染，係肝火，搵隻匙羹刮個背脊應該會有血痕！」10月生日的泳兒透露計劃考完車牌之後，買架靚車畀自己做生日禮物。