陳慧琳恨女幫蝦餃紮辮
陳慧琳（Kelly）昨晚畀面出席雷頌德新店開張，做了潮媽的她最愛為「蝦餃仔」扮靚，已經將老公Alex置諸腦後。
雷頌德（Mark）設計男裝品牌COOLDAY,SIR Solo Shop新店昨晚開張，獲好友Kelly、黃偉文、麥浚龍、Janice Man（JM）撐場，Kelly穿上黑色連身短裙美艷登場，JM就性感迷人，各擅勝場。穿了自家品牌格仔恤的阿Mark和即將臨盆的太太周圍招呼朋友，古巨基雖然人沒到，但就送上花牌祝賀。
怕黐身唔搞品牌
問Kelly有冇興趣自設品牌？她說：「暫時未，因為家庭同事業都好忙，搞品牌會好黐身。（係咪幫囝囝同老公襯衫？）囝囝我搞掂，老公已經放棄啦。」記者笑她要細唔要大，Kelly笑說：「唔係，係老公唔使我，佢着嚟着去都咁靚仔，囝囝可塑性高啲。（買名牌畀佢？）唔會，細路仔大得好快，好多衫着一、兩次就唔啱，好嘥。」
眾所周知Kelly恨做第二任媽咪，問是否將「蝦餃仔」的靚衫留給細佬妹？她聞言忍不住開心說：「希望啦。」對於有媽咪恨生女，竟將囝囝扮女仔，Kelly自爆：「囝囝有好多頭髮，我試過幫佢紮辮，不過佢唔肯，我就將個髮卷擺喺佢頭上面，哈哈。」
黃偉文謂跟阿Mark相識十多年，之前曾合作歌曲有好成績，問會否注資時裝店？他說：「唔得，自己有時裝天分，但冇管理才能。」
採訪：音樂組