福岡事件藝人關心
中國遊客在日本福岡被圍攻辱罵，惹起圈中人哄動，紛紛發言批評事件。
Janice Man：「唔係好清楚事件，不過我有套網劇《Heart Of Gold》去過日本東京取景，希望事件盡快平息！」
陳慧琳：「嘩，都幾恐怖！喺事情未解決之前都唔會去日本，始終屋企有老有嫩；我都有朋友喺日本住，但只係傾湊仔經，冇講政治！」
陳法拉：「唔了解呢件事，唔知組成呢隊人嘅背後原因，等我了解咗先。（會唔會唔去日本？）我記憶中去親日本都好安全，特別情況下去旅行都要小心啲。」
麥浚龍：「我有生意喺日本，中日事件到依家都冇受影響，嚟緊都會過去跟番啲生意。」
擁有一半日本人血統的前歌星裕美：「凡事都有解決嘅辦法，唔一定要用暴力，用暴力傷害人只會令仇恨加深，發生咩事都應該冷靜去處理！」
周啟邦兒子周國豐：「諗住聖誕節去日本玩，聽到咁嘅消息都未必去，可能因為最近中日關係緊張咗，原本仲諗住帶埋BB去，依家更加唔會。」
「日本通」王友良：「以前喺東京都見過一啲激進分子，佢哋會揸車用大聲公大叫，宣傳大日本主義，不過都冇人會理。唔知係咪東京市以外會偏激少少，我喺東京生活咗咁多年，就冇遇過。」
