暴瘦祖兒開騷玩潛咪
容祖兒（Joey）雙喜臨門，新碟銷量報捷兼演唱會宣布加場，不過成功背後，Joey卻捱到頭暈兼暴瘦，但她不擔心個唱時身材欠睇頭，笑言屆時將施「潛咪大法」，會令神迹再現。
Joey昨日舉行「《空港》雙白金銷量冠軍祝捷會& Concert Number 6容祖兒演唱會強勢加場」記者會，除宣布新碟銷量達三萬張數字外，演唱會三度再加，由十一月十九至廿四日，現加廿五及廿六日，一共八場。英皇高層吳雨為賀Joey勢如破竹，送上八個貼上喜字的椰子，寓意她嫁給紅館。Joey接到賀禮後，即笑說：「阿媽聽到唔開心，但我好開心。」
鋼條人阿媽心痛
身穿露臍低胸背心，外披西裝褸襯皮褲的Joey，明顯再瘦一個碼，她無奈說：「做得（指工作）太厲害，一個月要做晒兩個月嘅嘢，我已經瘦到最瘦時嘅新低點。」她相信到正式練舞、操體能時，將變成「條柴」或「鋼條人」，令其母大表心痛。
問她可擔心演唱會時胸部更平？她哈哈笑：「我幾時有嘢睇過呀？（但上次做慈善騷都有啲喎？）好似海市蜃樓咁，一瞬即逝，或者我『潛一潛』搵番出嚟。」雖然體力已透支，但Joey仍自信可再應付加多兩場，平之前十場「Star Light容祖兒演唱會」的紀錄。
唔介意海報被彈
有報道批評Joey個唱海報及《破相》MV造型如「哈囉喂」？Joey不慍不火謂：「MV造型係配合氣氛，我好多朋友都讚海報造型靚喎。」她覺得不能討好全世界，只要大部分人認同就得。至於有傳英皇踢走泳兒及鍾舒漫？她指最高領導已交代不是事實，覺得兩人年資深，對是非應有抗體，而Joey對她們的評價是努力兼力求進步。
採訪：音樂組