林憶蓮扭腰壓軸Rock興全場

Jun前晚於Star Hall舉行演唱會，一眾好友包括林海峰及太太彭羚、吳彥祖、Mr.成員Tom及緋聞女友Evelyn、方大同、吳雨霏等捧場，星光熠熠！Jun除了表演出色打鼓技術外，更以結他自彈自唱過去十年多以來的創作，他說：「多謝大家，卒之輪到我喇，十年冇開演唱會，多謝你哋踴躍支持！」

掟鼓棍送觀眾

期間Jun邀請到神枱級嘉賓張學友及林憶蓮同台演出，學友在Jun的結他伴奏下演唱《Soldier of Fortune》，不時騷出招牌蘭花手，Jun向歌神跪拜及相擁，興奮的學友突爆一句「Holy」，Jun竟然爆粗回應：「Shxt！」，而壓軸出場的憶蓮以小背心上陣，跟24味Crossover大玩搖滾音樂，更High爆又扭又跳穿插人群，風采依然，憶蓮逐一跟24味成員擊掌後就不發一言落台，Jun更笑言：「頭先嗰個真係林憶蓮嚟呀？點解會咁架？」Jun於個唱尾聲向台下觀眾掟鼓棍大送禮，不少觀眾爭住要。

憶蓮在台上又扭又跳，Rock爆全場。	恭碩良向學友下跪，學友見狀即「回跪」。	放大圖片

唔搶嘉賓風頭

慶功宴上，Jun表示演唱會非常成功，令他很開心，他說：「今次碌爆晒人情卡，請到憶蓮同學友做嘉賓，（點解唔合唱？）呢個係禮貌，唱歌係佢哋專業，我專業係打鼓，我都好想聽佢唱歌。（同學友講粗口？）我係講Holy Sheet，係澳洲一個床單牌子。」他表示上月跟吳彥祖開設的經理人公司正式簽約，感激對方相信他，並介紹他擔任電影配樂的工作！

恭碩良表演連體彈奏結他。

吳彥祖（右三）亦有出席演唱會慶功宴。

採訪：音樂組