李蕙敏恨到染髮谷胸行騷
女歌星李蕙敏（Amanda）將於本月三十日出席一個髮型騷，屆時Amanda將以古歐時代的宮廷打扮亮相，並需將秀髮漂染，她說：「會漂到淺金至白色，起碼漂六個鐘以上，仲要分幾次漂。（秀髮好傷？）唔怕，我以前都試得多，不過係第一次漂到咁淺色，我好『恨』做呢啲騷，好想試宮廷打扮。」
昨日Amanda到髮型屋試造型，並與髮型師Roy研究如何漂染，她還出動私伙束胸衣試身，營造谷胸效果，相當性感，令人眼前一亮。為了髮型騷，Amanda還特意瘦身：「我一向戒澱粉質，呢個星期都係食菜同海鮮為主，真係瘦咗。（習慣着束胸衣？）都OK，但會着到胃痛，做嘢咁着都冇所謂，出街就梗係唔會啦。（谷晒胸喎？）少不免啦，依家我有C Cup，好滿意，（有冇試木瓜豐胸？）咁又冇。」
場地及髮型：Roy Yung@KEN QI