諸葛周秀娜日程不改

諸葛梓岐：我啱啱由日本工作返嚟，過程好順利，不過我喺酒店樓下見到有日本政治人士遊行，同埋有架車上寫住「釣魚台」呢啲字眼。（擔心？）唔會，但我會支持自己國家，見到中國船長獲釋，真係好開心，相信所有中國人都好開心。下個月中我會再去日本工作，暫時不受影響。

周秀娜：今日睇到報章見到船長返咗屋企，都戥佢同佢家人開心。我覺得娛樂同政治係兩件事，所以唔會受影響，十月我會去日本幫雜誌影時裝相，冇影響我哋行程。

Angelababy經理人Kim：Baby依家忙緊去內地發展同拍戲，同埋我哋嘅工作同政治都扯唔上關係，接觸嘅人都係fashion界嘅朋友，佢哋好錫Baby，所以都唔會擔心工作受到影響。

椋名凜未有壓力

椋名凜經理人：椋名凜依家喺日本，今次係政治問題，相信香港人分得好清楚，喺日本暫時感受唔到任何壓力。

王友良：上星期我喺涉谷見到有啲右翼分子反華，但我覺得係小部分，喺日本感受唔到強烈嘅反中國情緒。生意方面完全冇影響，仲有唔少日本客人叫我喺香港同內地發掘新面孔，所以香港模特兒唔會有影響。