深情對話：草蜢臻化境：團結斷折難

蔡一智：智 蔡一傑：傑 蘇志威：阿細 記者：記

兄弟篇

記：40幾年兄弟，對方做過乜嘢最令自己感動？

智：我哋識咗太耐，一齊住咗太耐，早已變咗屋企人，但往往最疏忽就係屋企人；外國、本地好多組合離離合合，唯一我哋三個冇分開，好多朋友問點解？我哋都答唔出。

傑：我送過一張自己都未捨得買嘅arm chair畀阿哥做生日禮物，張櫈好靚，好似first class飛機椅，喺10年前要三萬幾蚊，買嘅時候自己影咗張相留念，之後我都冇坐過，唔知佢有冇畀人坐。

智：我睇咗三年，自己唔捨得買，張櫈係飛機師設計，真皮，依家一定要7、8萬蚊，收到時個心好喜悅，但又唔會好似其他人咁感動，因為我哋熟到無論對方做乜，都好似老馮咁。

情比金堅 歃血為盟

記：三個裏面傑仔最細心？

智：05年做完演唱會後，傑仔叫我哋上佢屋企食飯，唔好帶家眷，大家飲酒傾偈，無啦啦佢攞三個金牌出嚟，我哋每人一個，明明送畀我哋，又整一個畀自己，都唔知乜意思。

傑：紀念囉，好似以前歃血做兄弟。

阿細：掉轉係我唔會做。

傑（笑）：掉轉阿細做，我哋會以為佢有癌症，就嚟死。

智：我唔覺驚喜，大家熟到咁，覺得係老馮。

傑（扮哀怨）：我以後唔咁蠢。

嗌完算數 冇隔夜仇

記：阿細夾喺兩兄弟中間，有冇覺得佢哋會偏私？

阿細：外人眼中有兩兄弟，我唔會得到着數，但我哋三個走埋一齊40年，其實冇分彼此，冇兄弟朋友分野。

智：我未試過同阿細口角，反而我同蔡一傑經常嗌交，不過我哋冇隔夜仇。

記：究竟為乜事嗌大交？

阿細：我又唔記得，通常都係為公事嗌，私事唔理。

智（玩踢爆）：有次蔡一傑同阿細嗌到好激，講嘅嘢超過大家底線，幾乎郁手，後來不了了之，激餐死幾好笑。

傑：依家境界唔嗌交，冇必要為呢啲事情勞氣，有氣都暖吓肚，大家都知大家性格。

慧眼篇

智：有件事冇乜人知，阿梅未搵我哋前，正式覺得我哋有潛質係張衞健，佢係我哋上一屆嘅師兄，話我哋style好日本仔，同嗰時佢嘅日本風好夾，不如好似近藤真彥同少年隊，夾埋一齊排舞。

傑：佢亦知我係近藤模仿大賽冠軍。

智：觀眾第一次接觸草蜢，都以為我哋係張衞健請返嚟嘅日本仔，所以第一個慧眼就係張衞健，夾咗一段短日子之後，阿梅就搵我哋，因為張衞健知道我哋跟梅姐前途會好啲，但相對當時佢啱啱發展，有我哋就多啲新意，冇我哋就少啲力量。

分道揚鑣 攬住痛哭

傑：唔係，我補充少少，嗰時佢開始拍好多劇，叫我哋不如跟梅姐。

記：冇嬲你哋離佢而去？

智：冇冇冇，四個攬住有少少痛哭，好感觸，佢衷心祝福我哋跟梅姐，之後無論隔幾耐再見面，兄弟情感覺好快返嚟，我哋比安仔仲早識佢。

記：搵佢加入演唱會？

傑（大笑）：可以，只要佢減肥，或者黐番當年嘅頭髮。

師傅篇

記：依家諗起梅姐係咪仲好難過？

智：唔係叫難過，當然有掛住佢，我哋始終係樂觀嘅人，永遠向前看，但的確冇佢我哋就冇今日25年，演唱會必定唱阿梅嘅歌，喺舞台上紀念佢，每次演唱會都會流住阿梅嘅血，朋友都話有啲毛管戙，點解有阿梅把聲，可能我哋夾慣歌，唱佢啲歌有tone。

傑：阿梅把聲係男人偏高，女人偏低，好巧合地我哋拍佢天衣無縫，上天畀我哋緣分，上世結返嚟，今世相遇，相信下一世再重遇，佢可能做咗我細佬，我做佢家姐，總之一定有緣。

忍痛主持 送別阿梅

阿細：當年阿梅走時，出殯時我做《娛樂大搜查》主持，記得阿梅講過，我哋做Artist要專業，應承咗人做嘅嘢一定要實踐，我原本想唔做，但諗吓唔可以咁，卒之嗰日做到送阿梅上山火葬，成個節目我冇乜特別嘢，但Cut機就喊到收唔到聲，衝咗去錄影廠出面。

記：諗番阿梅彌留時，你哋陪佢嗰段時間係咪好深刻？

智：我反而唔係，最深印象係佢鍾意食嘢，我煮嘢畀佢食，叫埋阿詩、Eason，阿梅唔識煮，佢鍾意食，但學極都唔識。

傑：阿梅最鍾意食我整薑葱炒蟹，我嫌佢屋企廚具唔好，我連鑊都買埋上去。

成為笑柄 永不下廚

智：佢唯一一次煮畀我哋食，就喺佢屋企比併，每人煮一樣餸，佢煮草菇炆雞翼，造型好靚，色香味都幾好，唯一有血未熟，由嗰次開始，每年大食會都講一次，以後阿梅封廚唔煮。

阿細：好深印象佢帶我哋去銅鑼灣避風塘食嘢，坐船出海，阿梅話不如叫人嚟唱歌，感覺好得意，到依家都記得。

智：基本上草蜢去世界各地，東南亞、美加、歐洲，都係跟阿梅去，真係好似鄉下仔出城。

傑：同阿梅去游水最好笑，佢屋企有泳池，但其實阿梅唔識游水，我買咗鴨仔水泡畀佢，嗰個情景好開心、搞笑，後來畀我哋笑得多，佢終於學識游水。最難忘有次喺新加坡，有阿梅、張曼玉、學友、我哋做完義演之後，返酒店冇嘢好玩，想游水但泳池關咗，偷偷哋喺後樓梯拆走拉葉玻璃，竄入泳池游水，好開心，好深回憶。

將來篇

智：今年草蜢25周年，阿倫頒咗銀禧人畀我哋，希望25年後搞金禧人演唱會，可以由銀禧人變金禧人。

傑：我哋係第一個會員，銀禧人組合唔係個個有。

記：有信心唱到50周年？

傑：梗係有信心，依家有氣有力，（敲打枱子，發出嘭嘭聲）相信我哋絕對得。

智：阿倫都60啦。

傑（提高聲線）：25，真係吖，我相信我哋冇問題，每年一次Party同所有朋友一齊開心，每次同歌迷相約好似開大型派對。

接棒篇

記：有冇諗過搵接班人？

智：完咗演唱會，喺內地搵小草蜢，內地地大物博，人才濟濟，希望結集25年舞台經驗，同大家分享吓。

記：受阿梅影響一代傳一代？

智：都有，我哋吸取好多天王巨星舞台技巧，希望透過我哋三個一直解唔到散嘅組合，話畀大家知堅持精神，相信團結就是力量，有一隻歌，係我哋口頭歌。

阿細（清唱）：一支竹會易折彎，幾支竹一紮斷折難。（三子發出會心微笑，互相對望，一切盡在不言中。）

採訪：音樂組

攝影：黎志輝

場地：馬哥孛羅香港酒店

髮型：Jacky Ma@Headquarters