朱紫嬈見王子壓親痛在心
樂壇實力派女新人朱紫嬈（Khloe）愛心爆棚，家中飼養了三隻狗，而最愛的就是迷你貴婦狗仔「momo豬」，記得有次「momo豬」因工受傷，令Khloe心如刀割，足足喊咗一個月。
Khloe眼中，一歲多「momo豬」是她的「小王子」，雖然她生性慳儉，連常帶在身的化妝袋，都是廿多元的平價貨式，但「momo豬」的狗袋、玩具、零食都是「高檔嘢」，可見Khloe錫狗多過自己。拍照當天，Khloe為了「momo豬」上鏡更靚仔，特別送愛犬到寵物店沖涼、美容兼修甲，花費數百元也笑笑口。反而她為「慳得一蚊得一蚊」，自己動手化妝、整頭外，身上的衫褲，全是免費的贊助品。
邋遢豬變小天使
看見白如棉花的「momo豬」，Khloe面上不時流露笑意。問她和「momo豬」邂逅的經過，她說：「我買狗唔會衝動，『momo豬』係我諗咗一日先買㗎，但唔係好貴，只係三千幾蚊，因為佢喺寵物店時，size比其他狗仔大，而且好污糟，所以收得好平。」「momo豬」由當初的「邋遢豬」變成小天使，全因Khloe的悉心照顧，每天都為愛犬梳毛、解毛死結。
她記得有次帶「momo豬」出外拍照時受傷，令她傷心得喊咗成個月，Khloe說：「嗰次我同記者喺狗cafe做緊訪問，突然聽到『momo豬』大叫，原來佢被其他狗仔壓傷，見佢成隻攤咗喺地唔郁，我立即喊咗出嚟。」
Khloe即刻帶住愛犬看獸醫，醫生指「momo豬」前肢骨折要打石膏，她說：「好在冇生命危險，不過佢打石膏嗰排，食唔到嘢，又去唔到廁所，成日痛到叫，最肉赤係見佢好辛苦咁爬起身嚟歡迎我，我個心痛到不得了囉。」幸好經數月的休養後，「momo豬」終可完全康復。
高度劃分貴婦
Khloe的白色迷你貴婦狗外形像足一隻小綿羊，其實貴婦狗可分為玩具貴婦狗、迷你貴婦狗和貴婦狗三種，是根據貴婦狗肩膀的高度劃分出來。
貴婦狗有傳源於法國，但不少人相信正確起源地是德國，因牠的英文名「Poodle」是由德語演變而來，意思是「撥水而進」，最初主要用來獵鳥和在水中協助狩獵。貴婦狗是十分聰明的犬種，所以不少培育者都為貴婦狗而着迷，培育出迷你與玩具犬的品種。貴婦狗的披毛卷曲且濃密，在狩獵過程中往往引起不便，故修剪披毛成為貴婦狗必須的護理步驟。
採訪：音樂組