任達華溫馨中秋雙重意義
【戴佩玉上海直擊】任達華與琦琦日前帶同愛女任晴佳（Ella）到上海出席時裝活動，盡得父母演藝細胞的Ella不但在活動上聞歌起舞，更有一位小小死黨陪伴在側，而這位小小死黨也來頭不小，正是宇宙最強甄子丹的千金甄濟如（Jasmine）。
任達華與琦琦前晚出席上海世博園區內世界貿易中心協會館舉行的《LUISA CERANO 2010秋冬季品牌發布酒會》，雖然華哥與琦琦忙於與賓客們打招呼，但囡囡Ella與老友Jasmine亦自得其樂，大部分時間均手拖手，華哥亦不忘為乖女與她的老友影相留念。
同囡囡切月餅
華哥說：「今個中秋過得特別有意義，因為我用咗兩個零月籌備嘅花卉攝影集《五季》，限量發行咗二千本，係為咗籌錢畀中國創意基金，資助中國藝術家、發明家發展創意。記得我初入行窮到只係食兩隻雞蛋當飯，其實我八、九歲已經要執麵包皮用報紙煨嚟食，嗰段時間訓練咗我嘅生命力，到依家我都鍾意食麵包皮，緬懷一番。今個中秋節我又可以陪住我嘅第一季（琦琦）過，佢就好似春天咁靚，我又同囡囡一齊切月餅，好溫馨，今個中秋過得好開心。」
為甘國亮推job
華哥提到工作亦表現得十分雀躍，他說：「返香港要為甘國亮套新戲開工，（女主角係邊個？）我要留番畀甘生自己講，我只可以講呢個演員我未合作過，但我好鍾意佢。（戥君如食詐胡可惜？）我要收番之前送嗰部相機添，哈哈哈！其實甘生套戲早喺我攞金像獎影帝前已經傾好合作，後來個期押後咗，我推咗好多job，損失幾多都冇去計，一來劇本吸引，我相信套戲出嚟會OK，二來我想幫朋友，雖然今次我加咗少少片酬，其實唔夠彌補我推咗啲job嘅損失。」
琦琦則透露完成上海之旅，將到廣州拍廣告，她說：「今次因為Ella放假所以帶埋佢嚟上海，佢同Jasmine好好朋友，不過你哋影相唔好嚇親佢哋喎！」
