琦琦改機票翻啅水煮魚
一向愛食的琦琦，早前為拍攝新一輯時裝照，甘願捱餓，全日只食生果，難怪拍攝完要大食一餐水煮魚，而且為了食多餐，寧願不上飛機。
琦琦早前到北京為德國時裝品牌Hauber拍攝一輯時裝硬照，今次操刀拍攝的是中國數一數二的攝影師馮海，琦琦說：「我同馮海合作過好多次，所以完全沒難度，過程十分順利。（有冇得意事？）就係因為我太高，助手要打燈，當我企喺度時，打咗好多次啲光都唔平均，因為佢唔係好高。」
配飾過百件
琦琦又大讚今次品牌製作認真，除了幾十套服裝外，還有幾十對鞋，而帽及配飾亦超過一百件，品牌還帶備了不少水果給琦琦品嘗，琦琦說：「佢哋知我鍾意食水果，所以買好多畀我食，而且拍攝當日，我為咗有更好嘅效果，都冇食過嘢，拍咗一日，全程只係食水果，影完之後，我哋即時去開餐，去咗食水煮魚、酸菜湯圓，好好味，忍咗成日口，覺得特別好味，返到酒店，原本第日一早就飛返香港，但好回味個水煮魚，結果延遲張機票，去食多餐先返香港。」
卷髮新風格
琦琦今次以多個不同造型示人，包括爆炸頭、高貴及飄逸型格Look，各有特色。琦琦表示最鍾意卷髮的高貴造型，她說：「個髮型有啲復古，但配襯嘅衫着起上嚟好有型，有另一種味道。」
採訪：名人組