崔建邦雪中送炭：永遠支持陳生
陳志雲正式被廉署落案起訴涉嫌串謀貪污詐騙後，有藝人即與他劃清界線，人情紙咁薄，就連多位愛將都「潛水」，但昨日鄧健泓及崔建邦出席公開活動時，就公開表示會永遠支持恩師，實行雪中送炭。
陳志雲正式被落案起訴涉嫌串謀貪污詐騙，有指不少藝人之後都要上庭作證，但日前傳媒問牽涉藝人回應時，紛紛與陳志雲劃清界線。陳志雲愛徒崔建邦、鄧健泓昨日於公開活動中，在記者連番追問下，終於首次對陳志雲事件作出回應。
讚志雲堅強ＥＱ高
崔建邦坦言有傳短訊給陳志雲，指對方心情平復，對於有謂他因自保而與對方劃清界線，他說：「冇任何嘢會影響我同陳志雲嘅感情。」問擔不擔心陳志雲？崔建邦想了一會謂：「我相信同永遠支持陳生，不過我人微言輕，可以做嘅唔多，只可以講，冇陳生就冇我。」問他會否去聽審？他表示對方有需要他去便去。
鄧健泓不諱言有傳短訊給陳志雲，又否認無綫下封口令，問他要否出庭？他說：「我應該唔使，由呢件事發生到依家，未做過任何調查。（會否探佢？）暫時應該未必會。（有人同佢劃清界線！）我唔係囉！到呢一刻佢都係我恩師，佢的確幫過我。」他又表示有點擔心陳志雲，但對方ＥＱ高又堅強，希望他可堅強面對。
而獲撤銷到廉署簽到的寧進，昨日於電話中接受訪問，他表示連日來都有跟陳志雲傳短訊，對方表示適當時候會找他，有指他已經跟陳志雲「擘面」，沒有大水喉關照的他更要賣樓、頂酒吧，對此寧進否認謂：「我視佢亦師亦友，會無限量支持佢，我冇同佢不和，酒吧只係想頂畀人，咁樓價好咪賣樓囉！」問他會否聽審作支持？他謂：「出到就出，為咗唔會招話柄，事前都會問律師意見。」寧進又表示陳志雲一直照顧他，更感染他做了教徒，現時更每晚為陳志雲祈禱。
陳倩揚知冇酬勞
陳倩揚之前曾義務出席陳志雲活動，她表示工作由經理人安排，坦言當時知道沒有酬勞，至於需否上庭？她表示未收到通知。黎耀祥出席活動時被問到要否出庭時謂：「好似話第一堂冇我！」而陳百祥則指陳志雲應付得好好，更贈他一句：「解鈴還須繫鈴人。」
文：影視組