黃凱芹開騷 湯寶如爆粗贈興
前輩級歌手黃凱芹（Chris）前晚為一連兩場的Star Hall演唱會開鑼，邀請到湯寶如、前DJ好友余劍明及冼色麗等擔任嘉賓。Chris在台上演唱多首經典金曲外，更大講笑話盡顯幽默一面，他說：「好多謝今晚冇去睇周杰倫演唱會嘅人，紅館個期好難book，今日畀佢book咗，我惟有喺呢度開歌迷會！」他表示一向欣賞周杰倫，更自彈自唱他的《菊花台》。
湯寶如屬於寶麗金年代的好友，二人在台上傾偈傾到雞啄唔斷，Chris提到香港物價高漲時，湯寶如更不慎爆粗說：「挑！我見過二千幾蚊西瓜添啦！」Chris聞言即笑不攏嘴，湯寶如說：「我有講粗口咩？冇呀？呢個唔係我形象嚟喎！」Chris回應說：「物價的確係加得好離譜，你爆粗都啱嘅，唔好再兜喇！」