啪藥開聲演唱 祖兒頻失眠攝太歲求救
容祖兒十一月紅館開騷，有感今年健康欠佳，頻頻失眠不適，一向不迷信的祖兒，自爆叫母親幫她「攝太歲」為求「有覺好瞓」。
祖兒剛推出的EP《空港》反應熱烈，前晚穿上ashish白色冷衫配Chanel黑色長靴以歌會知音舉行新碟見面會，雖然祖兒不時見「咳」，但未有影響演唱表現，依然有超水準演繹。音樂會後，祖兒坦言吃了藥才開到聲，覺得今年特別多病痛，前幾天更請母親為她「攝太歲」：「係咁病，真係乜都試吓。（財多身子弱？）唔係啦，係唔夠瞓。」
安眠藥食到蠢
祖兒表示因為緊張十一月的個唱，經常在床上眼光光到天光，記得上次十場的演唱會，她便連續十日失眠，她謂：「因為On Show每晚心情都好Hyper，返到屋企都Cool Down唔到！」但祖兒卻拒服安眠藥：「食完暈陀陀，又怕愈食愈蠢，我已經好蠢啦！就算瞓到都唔係好質素嘅睡眠。」
尊重無綫合約
講到謝安琪贊成廣管局調查無綫壟斷歌手亮相其他電視台？祖兒表示：「我哋係有合約喎，係唔可以同第二間電視台合作，唔知呢，或者我讀得書少啦，但要尊重合約精神，咁簽約時候你有權選擇唔簽，冇人逼你。（可覺無綫壟斷？）TVB係有佢嘅力量，但呢啲嘢唔係我去討論，我哋合作好耐，唔覺得有大問題呢。」
文：音樂組