喜劇演員 數漏偶像 阿佘補鑊讚發哥槍王
佘詩曼及陳豪主演的《公主嫁到》，連國際級影星周潤發亦被吸引到晚晚追看，更稱讚二人愈演愈好，阿佘對獲發哥點名讚賞大表興奮，但談到最愛喜劇演員時，卻漏提發哥名字，她辯稱因為自己喜歡發哥揸槍型仔look多一些。
佘詩曼、陳豪等多位《公》劇演員，昨日以劇中造型現身屯門仁愛堂「《公主嫁到》之愛心善心慶中秋」活動，阿佘談到獲發哥點名讚，她說：「好開心，係好大鼓勵，我嘅喜劇細胞仲有好大進步空間，會繼續努力，希望畀多啲評語我哋，咁先有改善。（鍾意咩喜劇演員？）周星馳、毛舜筠。（冇發哥份？）我鍾意佢揸槍Mark哥型仔look多啲，我係佢fans嚟！出道冇耐，有次公司叫我返訓練班旁聽，原來係發哥主講演戲技巧、演員道德，發哥好nice、好casual、好friendly，我被佢風采迷倒，但我都有留心佢講嘅內容，佢嘅說話對我好有影響。」
陳豪希望越級合作
陳豪亦面紅紅多謝發哥，他說：「多謝晒發哥，畀到好大鼓勵我，我會繼續努力，可能我鍾意玩，鍾意試唔同劇種，我自覺幸運，今次中到發哥嘅喜好，希望再實驗多啲，拍多啲大家覺得有瞄頭嘅作品。（想同發哥合作？）嘩！求之不得，發哥係國際級架！」
法拉挑戰更高目標
而出道初年已曾被發哥點名稱讚的法拉則說：「阿佘同陳豪做得好好，我有向阿佘偷師，（想唔想再被發哥讚？）當然想，但當年我係新人，依家已經唔係，我要向更高目標進發，希望到時可以得到發哥同觀眾嘅讚賞。」李香琴在遊戲環節時聞歌起舞，做出唧胸動作，笑爆全場。
文：影視組