A.Lin擬跟影帝學藝 秋生冇面畀謝絕拜師
黃秋生早前因「妓女論」來批評時下o靚模而掀起一陣熱話，前晚秋生與一班o靚模A.Lin、DaDa同場險碰面，A.Lin希望向秋生拜師學戲，秋生即冇面畀：「唔好拜我，我未死。」
前晚吳雨霏和LMF為「PUMA Archive Uncovered」音樂派對演出，吸引黃秋生、梁漢文夫婦、MC Jin、尹子維及一眾o靚模捧場，而黃秋生自「妓女論」一直未有機會與o靚模同場，當日曾寸嘴反擊的A.Lin和DaDa，問到與秋生同場可怕尷尬？兩人表示對於前輩批評已經釋懷：「開頭聽到係有啲嬲，後尾諗吓都有佢道理。」會否主動找秋生傾偈？A.Lin即言：「都想主動搵佢，我都好鍾意睇佢啲戲，我哋會響影圈發展，都想喺影帝身上學到電影知識。」
緣慳一面
不過，最終A.Lin和DaDa都與秋生緣慳一面，問到遲來的秋生，有機會一見o靚模？秋生即抵死說：「我都唔認得邊個係！（A.Lin話想同你傾偈學戲？）傾吓傾吓就學到戲架，學戲要畀錢，要交學費！」A.Lin想拜師學藝？秋生更寸爆：「唔好拜我，我未死，佢拜詹瑞文啦！」
想孭舒淇
至於秋生與內地影帝黃渤合演《精武風雲‧陳真》承認大過戲癮，本應再有機會合作，但一場他要孭黃渤在高山行二十分鐘的戲，因體力問題他不敢接。加片酬可考慮？秋生笑言：「有錢怕冇命享喎！（孭女仔會唔會吸引啲？）咁要舒淇囉，舒小姐唔收錢都接，佢係天下第一美人嘛！」
文：音樂組