Rosemary照料病母患難釋前嫌
Rosemary與媽咪Julie的關係反覆無常，然而在最重要關頭，Julie總是不離不棄，盡顯親情可貴。Julie對女兒在美國闖禍不止沒有責罵，還挺身說好話，除不信女兒服食搖頭丸外，還澄清她撞車後沒有逃離。經此一役，母女關係開展了新一頁。
Rosemary在美國涉嫌藏有搖頭丸及撞車後不顧而去，日前她已平安回港。記者昨日致電Rosemary，聽電話的是其男性朋友，問到Rosemary的心情時，他說：「佢冇乜嘢，嚟緊亦會照樣出席慈善時裝騷，食得好瞓得好，因天氣唔好，佢留喺屋企睇電影同埋休息吓。」
say hello拒詳談
記者隨即問可否與Rosemary傾兩句，此時Rosemary在電話中說了一聲「Hello」，之後再將電話交回友人，友人強調Rosemary心情不俗，但暫不想與記者通電話。
至於Julie方面，她在電話中表示現階段也不知說甚麼好，並稱不是真的很大件事，不過仍希望日內開記者會盡快交代事件，她說：「佢嚟緊會有活動，希望喺活動前講清楚先，唔想影響有關嘅工作。」
問到母女關係是否和好？Julie說：「我哋依家關係好好，好過之前好多，件事令到我哋感情好咗，加上我有病，有啲嘢發生喺我身上，佢係知道，所以佢好照顧我，如果唔係都唔會搬返嚟同我住。（你有重病？）係，喺年頭已經知，乜病唔好講，Rosemary都唔知我有乜病，我依家精神唔係咁好，成日要喺屋企休息，同埋返教會。（Rosemary依家係咪喺度？）佢呢兩日去朋友度住，屋企門口太多傳媒等佢。」
否認撞車後逃離
Julie表示女兒沒有詳細談及在美國發生的事，只表示沒有撞車不顧而去，Julie說：「佢話佢冇不顧而去，撞車係因為對當地道路唔熟，同埋架車太大，只係撞咗小小，冇報道咁誇張話撞晒成個水龍頭，佢都冇逃離。」至於涉嫌藏有搖頭丸，Julie說：「佢冇同我講呢部分，話律師會處理，但佢從來都冇碰過呢啲嘢，佢飲嘢飲到high high哋都仲有，我自己認為佢冇食過，所以唔係好擔心。我希望佢喺呢件事上，可以學到啲嘢，始終呢啲事唔係普通人可以承受得起，希望佢從中有所得着。」
採訪：名人組