光影十年 黃山開竅
光與影是初學攝影的第一課，也是最深奧的一課，很容易去明白，很容易去上手，誠如爵士樂入門的一句「Easy to play, but hard to feel」如要得心應手，非要時間鑽研不可。
記：做過相機Sales，係唔係因此種下攝影興趣？
發：唔係，其實我拍《臥虎藏龍》後先開始對光與影同大自然產生興趣，記得當時李安帶我哋離開北京、上海，到黃山飽覽何謂一覽眾山小之境，真係看傻了眼，以前拍戲真係唔識欣賞造物者之奇，我係呢十年先真正接觸攝影，唔同以前只係影生活相，真係冇依家咁發燒，係另一種享受！
黑白世界充滿幻想
記：點解只鍾情影黑白相？
發：黑與白係另一個世界，畀人無窮無盡嘅想像空間，想像力豐富好多，就似夢境一樣。係，彩色係吸引到人，但對我嚟講，係滿足唔到自己要求。
記：到現時為止有冇一幀令自己滿意作品？
發：冇一張滿意，真係冇！其實影相就好似做人或做戲，就似一個歌手一生就算你有幾紅、幾有號召力，佢一生可能只紅一首歌！又好似梵高，佢到死後大家先知佢嘅畫有多美，大家先發覺滄海遺珠。其實影相好講彩數，去黃山十次都未必有一次得，有時要等人通風報信先可以知道幾時有好嘅光同雲。
記：通常幾點出動影相？
發：我影相好隨意，大前提係唔曬得黑，所以都係晨早或黃昏先出動！其實每個季節都有不同事物影，好似六、七月影荷花盛開，冬天就影殘荷，唔同時間有唔同風光。
記：鍾意自己入黑房沖曬？
發：係，呢個係一定，我一入黑房就由朝到晚十幾粒鐘，因為藥水新啲，曬嘅效果又會唔同，一入去我就唔知時間，唔知白晝定天黑，不過我知道幾時食飯！
菲島慘劇不忍拍攝
記：菲律賓人質事件，每一張相都震撼人心，換轉係你會點影？
發：我唔會夠膽影，呢件係唔開心嘅事，我真係影唔落手，更唔想喺相入面表演Sad嘅概念。
記：點睇呢件事，係咪應有更好處理方法？
發：呢件係大不幸之事，成個家庭一瞬間破滅，真係令人好Sad！其實件事冇話點去處理，喺第二個國家角度，我哋控制唔到，可能係上天安排，印證生命無常，人太多欲望不完，但原來隨時話走就走，又何必逼得太緊呢？但團友客死異鄉嘅結局真係令人黯然神傷。
逼巴士？唔折墮！
既然名利雙收，為何發哥會逼巴士、搭港鐵，難道是賤骨頭不成？對此，他笑得合不攏嘴，慢慢道出搭巴士好舒服的理論：「好多人都話周潤發你都折墮咯，搞到逼巴士！但我過海打死都唔會揸車，其實搭巴士真係好方便，唔使理泊車問題，可以坐幾百萬一架嘅Volvo，又有強勁冷氣、真皮梳化，真係好舒服，仲要二十分鐘就可以過海……你知啦！我買啲嘢咁刁鑽，同停車場距離一定好遠，唔通我身水身汗走去攞車咩？」
睇見發哥用的是舊式「Mo記」電話；吃的只是鹹魚青菜……在這種生活下，大多數城市人都吃不消。