早前盛傳與新片拍檔、法國男星奧利華馬天尼斯戲假情真搭上的奧斯卡金像影后荷爾芭莉，二人日前終於「斷正」被狗仔隊影到周街咀嘴！
最近荷爾與奧利華在法國巴黎忙於拍攝新片《Dark Tide》，早前有指奧利華在片場力溝荷爾，而荷爾前模特兒男友Gabriel Aubry亦傳有意與荷爾復合，令荷爾陷入三角戀的局面。
上周日，奧利華終於因近水樓台而奪得荷爾芳心!有指二人於周日下午把臂同遊花都一跳蚤市場，有目擊者指二人有講有笑似足一對情侶，絕對非朋友般簡單，之後荷爾就乘坐奧利華的電單車一同去餐廳食晚飯，晚膳後奧利華就帶荷爾散步夜遊花都。據目擊者所講最後二人就在奧利華的寓所門口咀足兩分鐘！
奧利華過去曾與不少圈中人包括Kylie Minogue及《變形金剛3》超模女星Rosie-Huntington Whiteley等有過一段情，有指現年44歲的荷爾火速搭上他的原因是「就手」。有指荷爾經歷過兩次婚姻失敗，最近與Gabriel的一段五年戀情亦唔能夠開花結果，加上有感年紀愈來愈大，擔心自己最終會孤獨終老變「剩女」，所以只好快快趣趣搵新男友。一知情者說：「雖然荷爾仍然將愛女Nahla放喺第一位，但由於時間不斷流走，所以佢都知道自己唔能夠太過揀擇。」
文：外娛組