姚子羚執靚個樣靠化妝
愈大愈靚的姚子羚，最近被指整容，當事人例牌否認，但她認同做藝人要以美麗外表取悅觀眾，並大讚剛隆胸兼割雙眼皮的莊思敏敢做敢認，非常夠薑！
姚子羚最近在新劇《公主嫁到》中飾演一名妓女，憑美貌吸引陳豪，她笑說：「我係陳豪嘅夢中情人，仲係佢救命恩人，所以佢對我產生好感。」子羚的美麗不僅於劇情需要，現實中亦愈大愈靚女。
瘦咗輪廓突出
近日有指她雙眼神奇變大、鼻樑筆直及面頰變尖，雖然有整容之嫌，但她仍大方回應：「唔會嬲，仲覺得好好笑，唔明點解靚咗咁耐依家先畀人講。其實剛出道時有baby fat，依家真係瘦咗，輪廓當然會突出啲，加上依家啲化妝技術咁犀利，黏咗假眼睫毛後雙眼可變大一倍，真係好神奇。」
讚莊思敏夠薑
對於整容風愈趨普及，子羚認為無可厚非，她說：「其實整容唔係大家諗咁嚴重，喺韓國、日本都好普及，有啲屋企人仲會儲錢畀仔女去整容添。某程度上，做呢行係要用外表取悅觀眾，唔靚又話，整容又話，真係好難滿足晒所有人，我覺得喺唔傷害人嘅情況下，做自己想做嘅，我係唔會反對。」她並大讚莊思敏十分勇敢，她說：「佢真係好夠薑，要面對大家嘅指指點點真係需要好大勇氣，但隆胸我就真係唔夠膽啦。」
另外，子羚最近到泰國拍飲食特輯，除一日食足五餐外，還讓她見識當地的精彩拳賽，她說：「大人比賽打到頭破血流，即使係兩個十歲小朋友對打亦拳拳到肉，我都唔敢睇。」
文：專案組
攝：攝影組
服裝、場地：Fly Girl