周奕瑋與楊紫瓊勾手指
無綫娛樂新聞台主播周奕瑋（Jarvis）被派往採訪本屆威尼斯影展。日前與余文樂遊聖馬可廣場做專訪之際，有幸成為導演劉偉強鏡頭下的主角，Jarvis坦言印象難忘：「嗰日我哋坐喺度歎咖啡食甜品，點知路過嘅劉導演一時技癢，抬起部機話要幫我哋拍shot，諗番起嚟都覺得緊張。」
Jarvis以往也曾採訪過康城影展，與楊紫瓊（Michelle）亦早有交情，今次再遇，他亦追問對方何時結婚，想不到Michelle原來對Jarvis相當有印象，他說：「佢話我做乜成日追問佢呢個問題，仲同我勾手指，約定有好消息一定會第一時間話我聽。」