焦媛讚思琦純品冇污染

身兼演員和藝術總監的焦媛聯同楊思琦、歐錦棠和李潤祺，首次合作由高志森執導的音樂劇《情場如戰場》。眾人為音樂劇忙於排練踢躂舞，現場所見眾人相當合拍齊整，焦媛說：「我哋排咗幾個星期，每日最少四個小時，個個都排得好辛苦o架，我對腳仲排到瘀晒。」

獲提點當妹咁錫

而首次演出音樂劇的思琦表示，除了跳踢躂舞有難度外，更需要同時兼顧唱歌、跳舞和演戲，對她來說是一個大挑戰，她說：「焦媛演出經驗比我豐富，遇到難題都會主動提點我、教我。劇中我哋飾演兩姊妹，但台下佢都對我好似妹妹咁錫。」

焦媛亦大讚思琦是圈中難得一見純品的演員，她說：「人哋話娛樂圈係大染缸，佢就有出污泥而不染的感覺，對自己要求好高，每次都話唱得唔好要求再嚟過，但我哋個個都覺得佢已做得好好，根本冇問題。」

焦媛和思琦穿起六吋鬆糕鞋，一步一驚心。

歐錦棠（左起）、思琦、焦媛和李潤祺穿起懷舊服裝，造型相當過癮。

六吋踭步步驚心

劇中以七十年代為時代背景，戲服亦相當懷舊，二人需要穿上六吋高的鬆糕鞋演出，二人可謂一步一驚心，焦媛說：「綵排都要着住，返到屋企對腳攰到冇晒知覺。」而思琦則表示要好小心處理，否則拗柴會影響之後的演出，她說：「夢境成真嘞，依家咁高可以做超級模特兒嘞。」

文：影視組