馬國明咀硬楊怡走唔甩

楊怡、馬國明、黃浩然、陳茵媺等昨日在將軍澳電視城為劇集《真相》進行開廠拜神儀式。馬國明拍《談情說案》時相當花弗，今次再與楊怡合作，他笑說：「上次就係爭楊怡食唔到，佢今次走唔甩喇，我會要求導演加咀戲，當楊怡係個橙咁食。」

新劇中飾演律師的楊怡表示：「法庭戲好多對白，比《宮心計》仲多，依家見到劇本都驚。」有指她「變臉」，楊怡說：「如果有都係喺阿媽肚裏面整囉，幾好呀，自己又冇是非都冇乜新聞，又可睇到自己進步。」她又表示不會刻意像Angelababy般找人驗證。