群模撐為人正面
Rosemary在美國涉毒被捕，震驚香港模特兒界，其中不少名模更不敢相信是事實，力撐Rosemary為人正面，工作態度專業。
陳嘉容：「我唔知佢有咁嘅嗜好，佢不嬲好乖，可能係貪玩，喺外國好多model有咁樣，但我自己好抗拒，呢樣嘢唔應該掂，毒品會影響身體健康、身材及樣貌，有乜要我幫，我一定幫。」
汪圓圓：「希望佢冇事，佢個人好好，做嘢好專業，好有自己風格，最記得自己初初做模特兒時，就係同Rosemary行騷，佢好肯教新人。」
戴妮廷:「我哋係好朋友，好擔心佢，我一星期前同佢通過電話，當時佢已經喺美國。我冇聽過佢有咩不良嗜好，之前受訓期間佢酒都唔飲煙都唔食，好健康，佢係一個好正面嘅人。可能佢受到朋友引誘，一時貪玩。每個人都會犯錯，希望大家可以畀機會佢，原諒佢。」
姚予晴:「好驚訝，知道後呆咗幾秒先出到聲，以為睇戲先有，好擔心佢，唔知佢係咪保釋期間出事，如果係就罪上加罪，佢平日好友善，唔覺佢有迷幻感覺，佢份人好單純，思想簡單，應該受其他人引誘，希望佢冇事。」
諸葛梓岐:「有睇報道，係咪畀人屈？佢畀我印象好健康，成日做運動，都好擔心，但冇佢電話，冇得打畀佢，我哋唔算係好熟嘅朋友，但每次見到都會傾偈。」
楊崢：「好震驚，佢係叻女，好聰明，好有教養，相信今次係一時衝動，處理上不智，呢行壓力係好大，當然藏毒及不顧而去係犯法，希望佢吉人天相，識佢咁多年，睇住佢入行，如果有需要會幫手，呢刻我覺得唔好騷擾佢。」
