Rosemary下周返港行騷

Rosemary為了美國之行,已推了昨日的Paul & Joe新店開幕時裝騷及未能趕返出席明天舉行的YSL時裝派對,不過下周四(16日)她將要出席善學慈善基金晚宴,為時裝設計師何國鉦(Dorian)行騷。

Dorian表示由細睇到Rosemary大,又與Rosemary母親Julie相熟,絕對相信Rosemary為人,他說:「我哋一早book咗佢做騷,我都知佢去咗美國,下周會返嚟fitting,不過尋日(前日)助手都搵唔到佢,我知道發生事後有打畀佢,但搵唔到。(佢朋友透露佢下周二(14日)返港?)返得嚟就冇事,個騷會如期舉行,到時等佢自己交代,我相信係誤會。」他讚Rosemary工作專業,又乖又孝順父母,慨嘆對方不幸誤交損友。

而林莉昨日為Paul & Joe時裝騷擔任模特兒兼新店剪綵嘉賓,接受訪問時被指是執Rosemary二攤,她坦言毫不知情:「我唔知自己係補位,我之前同佢都有一齊行過兩、三次騷,我好欣賞佢!」對於Rosemary涉嫌藏毒一事,林莉表示很震驚:「我覺得佢好nice,係一個開心女仔,大家一齊開工佢都會主動同我講嘢,我哋仲有交換電話,我仲記得佢講過好少clubbing。(覺唔覺得佢壓力大?)唔會!佢畀我感覺係好鍾意留喺屋企玩煮飯仔,會好sweet。聽到消息都好意外,我feel唔到佢會咁做。(影響事業?)希望佢可以喺演藝事業度做到鍾意嘅嘢!」