Ana R.突然轉軚疏遠Rosemary

同是混血模特兒的Rosemary與Ana R.本是多年好友，兩人情同姊妹，感情要好時經常出雙入對兼拍住夜蒲，Rosemary更曾搬到Ana家中居住。不過07年Rosemary因衰多口踢爆Ana的新戀情而令Ana大怒，好姊妹一度反目，後來Ana失戀獲Rosemary陪伴散心，兩人才冰釋前嫌再做好友。

同JC孖公仔

日前Rosemary在美國內華達州因涉嫌藏毒和撞車後不顧而去被當地警方拘捕，獲准保釋。昨日記者致電Ana，當她得悉這個消息後，竟表示和Rosemary經已好姊妹不再，她說：「其實我哋冇以前咁close，我當然唔想佢發生咩事，依家我最擔心係佢媽咪，因為佢媽咪要處理日後嘅事務。（你會唔會聯絡佢？）自己都唔可以做到咩，都唔想件事搞大。」昔日好友突然變得疏遠，相信連Rosemary也而始料不及。

據知Ana近日經常與同門師妹Jessica C.為伴，除了為Jessica C.早前推出的寫真集擔任形象指導外，更不時孖住high tea及shopping。對於Rosemary被捕，Jessica C.表示希望大家能給機會予Rosemary，她昨日接受電話訪問時說：「我同Rosemary唔熟，我都唔希望佢有事，工作唔好受影響，應該畀個機會佢。」

Ana R.表示和Rosemary已好姊妹不再。（資料圖片）

Ana R.（左）和Rosemary（中）經常結伴夜蒲，儼如「老蘭雙嬌」。

「冇見佢濫藥」

另一位曾是Rosemary好友的Lisa S.，亦與Ana口徑一致，揚言與Rosemary並非好朋友，不過她於七月底的婚禮卻有邀請Rosemary出席。昨日Lisa出席活動時得悉Rosemary涉嫌藏毒一事即反問記者說：「佢有毒品？我唔知道呢件事。喺美國藏毒係好大件事，喺邊度都係大件事。（你有冇聽過或者見過佢有呢啲不良嗜好？）我冇聽過或者見過佢濫藥，我同佢好少見面，我唔係咁清楚佢依家係一個點樣嘅人。都會擔心佢，任何人出事我都會擔心。世界各地都有好多模特兒濫藥，唔係一個秘密，呢行好易受到引誘，要堅決拒絕。」

文：名人組