Eason收千萬狂啜俏護士
陳奕迅（Eason）擔任潤唇膏代言人主力「賣吻」，除千萬酬勞夠吸引外，相信Eason覺得最爽的是，得熱情外籍小美人獻上螢幕初吻，並與她奉旨抱面親嘴十幾次，但又不怕太太徐濠縈打爛醋罈。
Eason憑健康形象獲潤唇膏品牌垂青，以千萬酬金任代言人，日前他花了三日時間拍攝電視廣告片，為配合以吻傳遞愛的主題，廣告商安排了多位演員客串，其中一位「女主角」，就是打扮成護士，年僅三歲大的外籍女孩。
擺垃圾桶要求高
當日小護士因鬧情緒而扭計，正當工作人員擔心會影響拍攝進度時，Eason的親切笑容令小女孩「破忟為笑」，當導演要求Eason和女童kiss時，女童如懷春少女般「嘟嘴」，啜到肉緊時更用小手抱住Eason叔叔的面，由於要遷就角度，兩人足足親吻了十多遍。
Eason又發揮其「吹神」本色，不停發表偉論，談及潤唇膏時，他表示：「咪以為我外表不修邊幅，其實我好鍾意搽潤唇膏，因為我個人好乾，出trip一定要帶潤唇膏喺身。」Eason又透露其生活習慣：「我對擺垃圾桶嘅要求好高，如習慣擺喺左邊，但有日見垃圾桶放喺右邊，我就唔高興，仲有垃圾桶同牆一定要保持距離，因為好易傳播細菌。」
湊女似行紅地氈
另外，Eason太太徐濠縈（阿徐）昨日出席時裝品牌活動，對於她日前帶囡囡康堤返學時，同行的Eason不滿黑面，阿徐撐老公說：「好正常啫，因為當時太多記者，好似行紅地氈咁嘅場面，我唔想騷擾到其他學生同家長，我都自責唔應該送女返學。」雖然暫未收到校方投訴，但為了女兒可過正常人的生活，她考慮明年不再親送愛女回校。
文：音樂組