周秀娜攝位 Stephy忍痛割愛

導演葉念琛《愛》系列電影，口碑、票房均不俗，《十分愛》、《我的最愛》更令鄧麗欣（Stephy）成千萬票房演員，原以為該系列長拍長有，豈料中途生變，早前周秀娜（Chrissie）跟葉念琛合作主持電視節目，身材正加超強人氣，終成功攝位，踢走導演愛將成為新寵，接拍電影《婚前試愛》。

Carol飽受折磨

日前，周秀娜秘密為該片開工，與羅仲謙拍攝一場嗌交戲，同晚還有「浸大E神」楊梓瑤（Carol）。周秀娜盡顯新寵超然地位，埋位前有四位工作人員貼身照顧，導演見天氣悶焗，又「萬歲」請食雪條，如此好招呼，周秀娜心情當然靚絕。

反觀Carol就無此待遇，穿上緊身T恤配熱褲扮Wet妹的她，沒雪條吃之餘，還要與羅仲謙在熱爆天氣下在街上喪跑，跑足一小時，然後更被羅仲謙用手掩口。可憐Carol勁吃NG，連羅仲謙也嘆道：「揸到佢塊面皺晒。」而片中Carol將獻出銀幕初吻給羅仲謙。

葉念琛對於系列電影換了角色，他說：「我每年都會拍一部『愛』系列電影，因今次部戲嘅話題性比較大，所以卡士方面都想搵一啲有話題嘅演員，好似Chrissie咁，形象性感得嚟，女觀眾都欣賞佢敢言有個性，再加上我同佢主持過節目，所以有默契。（擔唔擔心Stephy嬲你？）唔會，佢都要返內地拍劇啦！」

獲四位工作人員服侍，可見周秀娜相當得寵。	方力申、葉念琛與鄧麗欣這個鐵三角組合，曾創出票房佳績。（資料圖片）	初次演戲的楊梓瑤，於酷熱天氣下在街上狂奔。

兩者風格不同

問到兩者之間如何作出比較？葉念琛說：「兩個唔同戲路，Stephy拍過咁多愛情片，演到細膩嘅愛情感覺，Chrissie就可以拍得大膽啲，好似佢今次拍呢套戲咁，會係佢有史以嚟最激嘅一套，兩個女仔演嘅嘢都唔同，冇得比較。（覺得Chrissie演成點？）我覺得Chrissie演戲可以畀到我好多驚喜，係一位好專業嘅演員。」

周秀娜Vs鄧麗欣

年齡

周秀娜：25

鄧麗欣：26

三圍

周秀娜：32D、24、35

鄧麗欣：32B、24、35

必殺技

周秀娜：性感身材

鄧麗欣：青春玉女

演藝作品

周秀娜：電影《惡胎》、《矮仔多情》；寫真集及周邊產品如攬枕等

鄧麗欣：電影《獨家試愛》系列；歌曲《電燈膽》、《藍鞋子》、《好心好報》

票房

周秀娜：《惡胎》上映11日收約164萬、《矮仔多情》上映兩周收約322萬

鄧麗欣：《獨家試愛》總收約800萬、《十分愛》及《我的最愛》總收逾1200萬

文：影視組