張家輝新戲收得行股惑
張家輝憑英皇電影《証人》連下七城，勇奪影帝殊榮，昨日他連同英皇集團主席楊受成及導演林超賢出席祝捷會慶祝，現時《綫人》票房相當不俗，家輝說若有1,600萬票房，就會真空着「穿窿褲」環繞一周，笑言要練好股肌。
家輝剛於第十屆長春電影節頒獎禮中，憑《証人》奪得影帝獎項，過去兩年內，他已橫掃七大亞太區電影頒獎禮的影帝殊榮，成績驕人，昨日家輝與英皇集團主席楊受成、導演林超賢及英皇電影行政總裁利雅博於中環舉行祝捷會，齊齊開香檳慶祝。
老婆狂笑假哨牙
家輝對《証人》拿得佳績，無形中對正上畫的《綫人》有很大推動力，《綫》片上畫八日，已有700萬票房，成績斐然，就連家輝都自掏荷包買票到旺角戲院感受一下，他說：「之前受西片威脅好大，過咗佢好開心，我自己都畀錢入場睇咗兩次，戴住假哨牙同帽入去，見到啲觀眾反應好開心，坐我側邊個女仔都睇到喊，佢男友問佢做乜喊，我想話喊都好正常呀！」
家輝笑言假哨牙多年前貪玩到牙醫處訂造，價值四、五千元：「睇戲嗰陣戴住要成日吸番啲口水，之前喺屋企戴過，笑到老婆踎喺地。」
誇下海口玩真空
他透露《綫人》票房好有機會超越《証人》（票房790萬），問家輝會否挑戰自己，嘗試拍西片？他說：「我兼顧唔到講好英文對白之餘又要演好戲，寧願講普通話拍內地質素好嘅電影。」問及《綫人》票房佳，他有甚麼表示？家輝誇下海口說：「如果票房過1,600萬，我喺條褲度剪個大窿，然後環繞一周，裏面唔着嘢嘅！（咁咪露股肌？）要練一練先。」
文：影視組