江若琳餓困酒店擔遮搵食
江若琳（Elanne）與徐克昨日分別抵達水都威尼斯，為出席「第67屆威尼斯電影節」做準備，但威尼斯昨日卻橫風橫雨，歡迎這批來訪貴賓，Elanne更因大風雨而被困酒店，捱餓逾四小時。
Elanne主演的寰宇3D恐怖片《童眼》，獲邀參加今屆「威尼斯電影節」，但Elanne貴人出門即招風雨，她昨日在電話中說：「我哋被困酒店！本來落機都好好天，點知去到酒店就橫風橫雨，我睇電視天氣報告，因聽唔明意大利文，就問酒店職員，佢哋話係storm，當地好少咁惡劣天氣，由於超大風、超大雨，我哋被迫留喺酒店，不過酒店又冇乜嘢啱食，想話叫pizza，又話天氣太差唔送嚟，搞到我肚餓都冇嘢食。」
解禁食雪糕
Elanne望着勁差天氣，把心一橫打傘出外搵食，她說：「見啲雨細咗，咪擔遮出去覓食，街上好多單車吹到東歪西倒，有啲地方又水浸，不過太肚餓，最後我一手擔遮，一手拎住雪糕食，感覺零舍滿足，可能肚餓，二來因為之前為咗着靚裙出席影展節食咗一排，依家有得解禁，勁開心！」
而由英皇電影負責香港區獨家發行的新片《狄仁傑之通天帝國》，貴為今屆威尼斯電影節唯一入圍競賽單元的華語電影，導演徐克特別提前一天出發，並首次乘坐螺旋槳飛機，他說：「感覺好新鮮，呢次我去威尼斯有項重要任務，就係頒終身成就獎畀我老友吳宇森，但依家頒畀佢係太早啦，將來佢仲會有好多好電影，佢會有第二個終身成就獎！」
徐克會老友
徐克談到對《狄》片獲獎的信心，他說：「得獎並唔係目的，對我嚟講，可以趁機會喺威尼斯睇多啲好電影，見好耐冇見嘅老朋友，先係最重要！」又期待與評委主席鬼才導演昆頓塔倫天奴敍舊。
文：影視組