樂仔長氣袋吹足成粒鐘
余文樂talk得就人所共知，早幾日八太喺灣仔見識到樂仔嘅「耐熱」同長氣程度。佢喺三十幾度高溫下，坐喺街邊同幾個friend不停吹水，期間張智霖（Chi Lam）路過時加入「吹水團」，不過Chi Lam冇耐就閃人，唔夠樂仔咁「耐熱」，吹足成粒鐘先收口。
早幾日傍晚，身穿T恤牛仔褲、頭戴賊仔帽嘅樂仔，喺灣仔星街一帶同幾個朋友泊低架車落地吹水，其中一個仲係沈嘉偉細佬。雞啄唔斷嘅樂仔仲愈講愈興奮，傾到指手畫腳。
指手畫腳鬼咁肉緊
八太以為喺三十幾度高溫下，樂仔同班friend吹兩句就會上返車歎冷氣，點知樂仔不但長氣，仲好耐熱，見佢一落車不但係咁講唔停，口水多過茶，仲大街大巷講到郁身郁勢，手指指兼叉晒腰，鬼咁肉緊兼露埋底褲。傾咗成半個鐘，樂仔雖然出晒汗，但一樣唔捨得走人。
張智霖加入「戰團」
冇幾耐同樣都係吹得之人嘅Chi Lam咁啱揸車經過，樂仔見到同道中人梗係即刻捉實唔放，又同Chi Lam吹水。不過講多兩講，Chi Lam見樂仔個friend聽到悶悶哋，加上又熱辣辣就索性揸車閃人。
講咗成粒鐘，梗係口水都乾啦！見樂仔伸完懶腰就同另外兩個朋友齊齊上車去金鐘買咖啡飲。不過樂仔似乎仲未講夠，買完嘢飲之後仲要傾多輪先捨得走人。八太見佢全程冇停過咁滯，樂仔，你究竟有冇咁多嘢講呀﹖