何超雲靚仔行頭勁冧林峯

年初還出雙入對、在Facebook稱呼Andy為老公的超雲，有傳兩人各有「公主病」及「公子病」難互相遷就，加上有指賭王不滿Andy對長輩工夫做不足，令坐擁逾百億身家的皇帝女超雲實在唔憂嫁，戀情維持不足半年即告終。

不過，超雲未有失戀大過天，就連其妹何超蓮也抵死地說，指超雲還興奮的去看林峯演唱會，不覺得她傷心，據講仲睇咗兩場。言猶在耳，以林峯來療情傷的超雲，出席英皇電影《翡翠明珠》贊助商慶功宴，和林峯排排坐傾不停，更傳兩人秘密拍拖已半年。

超雲被妹妹超蓮爆睇林峯演唱會治情傷。

何超雲與Andy熱戀期間，更帶同男友與母親出席公開活動。

更正冇撇舊愛

昨日以黑色背心略展事業線的超雲，於中環ifc的連卡佛女裝部現身，對於和林峯的緋聞，超雲表現愕然說：「今朝已經有人畀我睇個報道，梗係冇啲咁嘅事，嗰晚同樂小姐食飯，咁就畀人寫。（同林峯係咪好熟？）唔熟㗎喎！（覺得佢靚仔？）佢梗係靚仔，好多人鍾意。（傳佢整容？）靚仔就OK啦。（有冇發展可能？）冇可能，同佢唔熟，（佢冇問你攞電話？）冇電話聯絡。」至於是否撇了皮草太子爺，超雲聞言即更正：「唔係撇，係和平分手！（依家有冇拍拖？）冇！」

靚仔林峯被指整容，但超雲一於少理，完全唔介意。

林峯的過氣緋聞女友鍾嘉欣聞言後祝福對方。

有份贊助電影

無綫製作資源部總監樂易玲表示，超雲的時裝店有份贊助《翡》片，故被邀請飯局，更言超雲之前不知林峯會到場：「當日阿峯拍劇，所以遲到早走，佢哋都冇坐埋一齊，阿峯係同我坐，佢哋冇乜傾偈，都唔熟，（有冇發展可能？）冇乜可能，阿峯都冇乜時間拍拖。」她更指超雲如好多富豪第二代一樣來看林峯個唱，更多謝超雲讚林峯靚仔。另外，林峯經理人表示指林峯對傳聞得啖笑，兩人在飯局才認識。對於緋聞男友林峯被傳有新戀情，鍾嘉欣說：「如果佢哋真係拍拖，祝福佢！」

文：名人組