好色男出錢隆胸 Ana R.嬲爆即撇
Ana R.昨日為羅浮宮擔任婚紗模特兒，見她身形比之前豐滿，問她是否正在蜜運中，但她否認拍拖並乘機澄清：「每次影到我同其他男仔出街，就畀人話佢係我男友，其實佢哋全部都只係朋友，咁會令佢哋嘅女朋友好唔開心。（之前影到你同個中國籍猛男一齊買餸。）佢係我朋友，嚟自台灣。之前影到我同個泰國朋友一齊，又話係我男友，其實佢係基o架！」她坦言因為傳媒關係，令不少男士對她卻步。
自言滿意身材
另外，提到同場行騷的莊思敏隆胸，Ana坦言之前在香港先生選舉中見過對方，並說：「我覺得佢身材冇變喎，同以前一樣。（佢割咗雙眼皮。）我覺得冇分別。可能因為佢着晒晚裝同化好濃妝，所以唔係好覺啦。」問她會否隆胸，她笑言曾有一名男士稱很喜歡她，並願意出錢給她隆胸，氣到Ana當場拂袖離開，她自言很滿意自己身材。
莊思敏冇再痛
至於莊思敏為法國婚紗行騷，對於Ana指她身材無變化，她笑言：「有啲人以為我拆咗，因為我冇再用墊，所以睇落去唔會好誇張。（男友睇過未﹖）睇咗。（話你正咗﹖）有呀！唔止佢，好多人都讚我。」此外，她又澄清有雜誌指她是倒米代言人的報道，她勞氣地說：「話我隆完痛好耐，佢真係倒我米，我只係頭幾日痛，之後都冇事，搞到啲客以為我未好番，唔搵我做嘢！」
有份出席婚紗騷的前落選港姐呂慧儀之前因穿着超Deep V晚裝擔任香港先生評判而被投訴不雅，她稱會接受觀眾意見，但試衫時不覺太誇張，可能因現場燈光才令效果更突出。
文：名人組