鄧紫棋愛才嫁硬林宥嘉
鄧紫棋（G.E.M.）出道至今緋聞不絕，近日有指她與台灣歌手林宥嘉打得火熱，兩人不避嫌拍拖睇戲，G.E.M.昨日冧笑默認戀情，大讚對方有才華，更視對方為結婚對象，並哀求傳媒給兩人空間。
G.E.M.昨日與王菀之（Ivana）出席電台活動，對於被踢爆於上月與緋聞男友林宥嘉到銅鑼灣拍拖睇戲，有備而來的G.E.M.扮傻說：「唔記得啦，我好冇記性。」問到是否與對方蜜運中？G.E.M.即露出冧樣兼甜笑，她說：「拍唔拍拖都唔會講，到結婚先會公開。」並擺出「嘉嫂」姿態突然爆出一句：「追求者要止步。」
希望22歲結婚
問到是否想將戀情低調？她說：「冇話高唔高調，希望大家畀空間我哋，佢好有才華。」19歲的G.E.M.坦言希望22歲結婚，問到是否搵到理想對象？她甜絲絲說：「世事難料。」對於另一緋聞男友陳偉霆將在電影中露股，G.E.M.反應極大說：「咁大鑊，冇睇報紙唔知。」並趁機與對方劃清界線說：「我鍾意揸『男醜股』，因為佢（陳偉霆）係唔怕醜嘅。」
Ivana押後宣傳
剛推出新專輯的Ivana坦言受菲律賓挾持港人事件影響心情，她說：「依家香港人個心都係諗同一樣嘢，所以將新碟宣傳延遲。（犧牲大？）唔可以咁講，呢個時間唔應該做呢啲嘢。」
文：音樂組