恭碩良活在音樂Rock到巴士

退隱樂壇幕前近十年，恭碩良（Jun）埋頭苦幹穿梭眾多歌手演唱會擔任幕後工作，主力擔任創作和「鼓佬」角色，間中亦有參演電影，其實他從未離開過音樂：「呢幾年我喺澳門大學修讀音樂課程，亦喺電腦錄音軟件公司做Sales Operator亞洲營業代表，我一直都活在『音樂』，依家對音樂嘅認知比以前更廣闊。」

瓣瓣嘗試

這十年「鼓佬」生涯令Jun與很多香港歌手成為好友，當中與陳奕迅（Eason）最投契，這與二人都熱愛音樂有關。Jun最近終於「的起心肝」開騷出唱片，全因Eason一句「死仔，快啲出碟啦！」令Jun立即動手。他說：「幸運地，呢十幾年同咗好多歌手合作，學到好多嘢，開騷出碟係為我音樂生命錦上添花，就如蛋糕上的車厘子一樣。雖然係咁，但我除咗唱歌和打鼓，彈結他、創作乜都參與，希望有新鮮感。」

人人可Rock

今年初，Jun捲入動粗打人事件，他說：「其實單嘢牽涉好多人，只係因為我比較有知名度，所以成為焦點，事情被歪曲。無論如何都告一段落，我唔想再講。」對Rock友都被封「火爆一族」，他有自己的見解：「Rock係一種態度，黃貫中話我唔食煙無紋身，連耳環都除埋依然好Rock，因為Rock係一種堅持，我覺得每個人都Rock得起，逼巴士都可以有Rock味！」追問Jun演唱會嘉賓名單，他堅持賣關子：「合作班底都係國際級，所以啲嘉賓聽到班底二話不說要嚟Jam一Jam。」

採訪：林嘉慈

攝影：黃叔榮

髮型：Timothy@Headquarters Hair Salon

化妝：Mary Jane

場地及服裝：8FIVE2SHOP