千嬅遭挑撥唔妥黎明
楊千嬅一直抱住「出嚟打工為求開心」，面對不實報道及是非均採取「多一事不如少一事」態度，但對於有指與前老闆黎明「唔妥」，則大方承認曾因歌曲雙方有意見分歧，強調有意見是合理，只是有人從中挑撥及發放不實消息。
入行十多年的楊千嬅對娛圈運作可謂睇通睇透，奈何是非愈來愈多，加盟Amusic後更是接踵而至，幸好千嬅天生樂觀性格未被困擾，提到與黎明不和傳聞，她無奈說：「同黎生合作係一個過程，點解啲人咁在意，只不過黎生係藝人易成為話題同八卦性，順理成章造成是非。」千嬅強調報道不影響對黎明的印象。
勇字當頭清者自清
千嬅坦言是有話直說的人，從不背後講是講非，並承認與黎明開會傾歌曲時提出意見：「做唱片係應該有意見先有進步。」心口掛住勇字的她強調有理必會出聲：「我係開會鋤落去講嘅人，隻歌唔啱我唱會同黎生講，呢個係一個過程。」問到是否有人搬弄是非？千嬅肯定口脗說：「實有，有乜出奇？十幾年經驗話我知，一定有，但我冇做錯，冇講過、冇做過唔使驚。」她表示清者自清：「總之明就明，唔明就唔明，同我做嘢嘅人都知，我係兜口兜面去講。」
力撐老公經濟獨立
對於老公丁子高慘被外間指「食軟飯」，自認ＥＱ夠高的千嬅說：「我早佢出世五年，佢冇可能會快過我，我欣賞佢有上進心同潛在能力，男人肯孭起頭家，我覺得承擔大過一切，唔係財富可以計算到，我哋財政好獨立。」問到父母有否阻止她與丁子高拍拖？千嬅承認雙親初次見丁子高曾擔心對方能否照顧到她：「擔心佢嘅能力，食過幾次飯就覺得佢好踏實。」
一息尚存不被打沉
曾被批評走音的千嬅憑07年個唱的精湛獻唱成功「洗底」，她坦言不要為一、兩句批評打沉自己：「一日在生、有心跳、有生命，唔好畀人講兩句就打沉，人梗係有起跌，話兩句都唔得點出嚟做人，要夠硬淨。」
要求極高的千嬅說：「一個傷風、一個噴嚏都唔得，因為係一個專業歌手，畀人話兩句冇辦法，要記住薪酬係包埋畀人批評。」
採訪：音樂組
化妝：Ling Chan@Zing the Makeup School
髮型：Vickwan@Hair Culture
服裝：LIMI Feu@I.T
場地：都會海逸酒店