曹格打機減壓袋 380萬做代言人
剛加盟bma的曹格（Gary），昨日到上海出席與摩力集團的簽約儀式，以重金三百八十萬人民幣為該公司網遊擔任代言人，兼為兩個網遊唱作主題曲。Gary坦言滿意酬金：「之前我一直都唔知道酬金，其實今日記者會先知酬金有成三百八十萬咁多，真係好開心，希望之後有更多公司搵我做代言人同搵我作歌喇。」
本身也熱愛玩網上格鬥遊戲的Gary說：「近半年我都鍾意打，好多時喺屋企玩，格鬥遊戲網上打就可以，因為可以同朋友玩，喺網上玩又唔會傷感情，現實就梗係唔好。」不過Gary表示玩網上格鬥遊戲純是用來減壓輕鬆：「唔好太沉迷，其實做每件事都要適可而止，就好似飲酒咁，飲少少可以養身，太多就唔係一件好事。」
想參觀世博
今次踏足上海，Gary本想去參觀世博，可惜行程太緊密未能如願。他說：「即晚就要搭飛機返去工作，今朝嚟嘅時候路經世博，見到好多人，雖然成卅八度，但冇阻大家參觀熱情，可知展覽幾成功，我一定要完結前來參觀先得。」